Իսրայելում երեք նախարար է հրաժարական տվել ՀԱՄԱՍ–ի հետ գործարքի պատճառով

Իսրայելում երեք նախարար է հրաժարական տվել՝ ի նշան ՀԱՄԱՍ-ի հետ հրադադարի դեմ բողոքի, հայտնում է «Ինտերֆաքսը»–ը:

Ազգային անվտանգության նախարար Իտամար Բեն Գվիրը հայտարարել է իր հրաժարականի մասին՝ հրադադարի համաձայնագրից հետո։ Այս մասին հայտնում է Times of Israel-ը՝ վկայակոչելով ծայրահեղ աջ «Օցմա Յեհուդիտ» կուսակցության հայտարարությունը, որի առաջնորդն է նա։

Բեն Գվիրը վարչապետ Բենիամին Նեթանյահուին մեղադրել է «գաղափարական բոլոր կարմիր գծերը հատելու մեջ»։ Նախարարը ՀԱՄԱՍ-ի հետ գործարքն անվանել է «ահաբեկչության լիակատար հաղթանակ»։

Բեն Գվիրի կուսակիցները՝ ժառանգության նախարար Ամիչայ Էլիյագուն և Նեգևի, Գալիլեայի զարգացման ու ազգային դիմակայության նախարար Յիցհակ Վասերլաուֆը նույնպես հրաժարական են տվել։

«Օցմա Յեհուդիտ»–ը հայտարարել է իշխող կոալիցիայից դուրս գալու մասին։ Կուսակցությունը հայտարարել է վերադառնալու պատրաստակամության մասին, եթե ՀԱՄԱՍ-ի դեմ ռազմական գործողությունները վերսկսվեն և շարունակվեն մինչև լիակատար հաղթանակը։