Ուկրաինայում վախենում են ԱՄՆ-ում Թրամփի նախագահության օրոք փոփոխություններից․ NYT

Ուկրաինացիները վախենում են փոփոխություններից, որոնք կարող են տեղի ունենալ հունվարի 20-ին ԱՄՆ նորընտիր նախագահ Դոնալդ Թրամփի երդմնակալությունից հետո։ Այս մասին գրում է The New York Times թերթը։

Ինչպես գրում են հրապարակման հեղինակները, ընդհանուր կարծիքն այն է, որ Թրամփի վարչակազմը փոփոխություններ է բերելու։

«Սակայն շատերը մտավախություն ունեն, որ այս փոփոխությունները լավ չեն լինի, հատկապես, եթե դադարեցվի ռազմական օգնությունը»,- ասվում է հրապարակման մեջ։

Հրատարակության զրուցակիցներից մեկն ասել է, որ շատերը Թրամփի նոր ժամկետը համարում են Ուկրաինայի ավարտը, սակայն ինքը դրանում վստահ չէ, քանի որ Թրամփը, իր խոսքերով, «անկայուն մարդ է»։

Ավելի վաղ Արտաքին հարաբերությունների եվրոպական խորհրդի գիտաշխատող Ջոան Հոսան CNN-ին ասել էր, որ Ուկրաինայի նախագահ Վոլոդիմիր Զելենսկին չի կարող իրեն թույլ տալ թշնամաբար վերաբերվել ԱՄՆ նորընտիր նախագահ Դոնալդ Թրամփին և պետք է փորձի նրան իր կողմը գրավել, հակառակ դեպքում՝ նա ստիպված կլինի կապիտուլյացիայի ենթարկել Վլադիմիր Պուտինի առաջ։