Թրամփը պահանջել է Պետդեպարտամենտի անդամների հրաժարականը

Ամերիկայի ընտրված նախագահ Դոնալդ Թրամփի թիմը պահանջել է Պետդեպարտամենտի որոշ բարձրաստիճան դիվանագետների հրաժարականը։ The Washington Post-ը կիրակի օրը, հղում անելով աղբյուրներին, հայտնել է, որ միջոցառումները նպատակ ունեն ցույց տալ «վճռական ընդմիջում» Ջո Բայդենի հեռացող վարչակազմի հետ:

Հրատարակության տվյալներով՝ «տասնյակ դիվանագետներ» հունվարի 20-ի կեսօրին հրաժարական են տալու՝ Թրամփի օգնականներից համապատասխան հրահանգներ ստանալուց հետո։ Հաղորդվում է, որ հարկադիր հրաժարականների թվում են լինելու ԱՄՆ պետքարտուղարի քաղաքական հարցերով տեղակալ Ջոն Բասը և էներգետիկ ռեսուրսների գծով պետքարտուղարի օգնական Ջեֆրի Փայաթը:

Դիվանագետներից մեկը, ում խնդրել են հրաժարական տալ, թերթին ասել է անանունության պայմանով, որ Թրամփի թիմը «խնդիրը պրոֆեսիոնալ է վարել»։ Նրա խոսքով, ապագա վարչակազմը «ցանկանում է իր տեղում ունենալ մարդկանց, որոնց հետ նախկինում աշխատել է»։

Ինչպես նշում է հրատարակությունը, այդ թեկնածուներից մեկը Լիզա Քեննան է, ով Թրամփի առաջին նախագահական ժամկետում զբաղեցրել է Պետքարտուղարության գործադիր քարտուղարի պաշտոնը։ Ըստ թերթի՝ սպասվում է, որ Քեննան կարող է ստանձնել պետքարտուղարի քաղաքական հարցերով տեղակալի պաշտոնը։