Միրզոյանի՝ Մոսկվա այցի շրջանակում Լավրովի հետ քննարկվել են բոլոր հարցերը. Հովհաննիսյանը՝ ԵՄ-ին անդամակցելու գործընթացի մասին

Ազգային ժողովում ԵՄ-ին՝ ՀՀ-ի անդամակցության գործընթացի մեկնարկի մասին նախագծի քննարկման ժամանակ ԱԳ նախարարի տեղակալ Պարույր Հովհաննիսյանը տեղեկացրեց, որ արտգործնախարար Միրզոյանի՝ Մոսկվա կատարած այցի շրջանակում ՌԴ արտգործնախարար Լավրովի հետ քննարկվել են բոլոր հարցերը:

«Հատուկ նշվել էր, որ բոլոր հարցերը քննարկվել են կառուցողական մթնոլորտում, հարց չէր մնացել, որի շուրջ չէր ծավալվել փոխըմբռնման մթնոլորտ»,- նշեց Հովհաննիսյանն՝ ի պատասխան «Հայաստան» խմբակցության պատգամավոր Արմեն Գևորգյանի հարցի, թե հնարավորություն եղել է պաշտոնական ուղիներով քննարկել ՌԴ փոխվարչապետ Օվերչուկի՝ ԵՄ-ին Հայաստանի անդամակցությանն առնչվող հայտարարությունները:

Անդրադառնալով հարցին, թե ռուսական կողմն ամբողջությամբ ըմբռնումով է մոտեցել ՀՀ-ի կողմից ԵՄ-ին անդամակցության գործընթաց սկսելու նախաձեռնությանը, դիտարկվո՞ւմ են արդյոք նախագծի աշխարհաքաղաքական ռիսկերը՝ ԱԳ նախարարի տեղակալն արձանագրեց, որ նման քննարկումները կրում են մշտական բնույթ։ 

«Բոլոր հանգամանքները քննարկվել են և քննարկվում են։ Ինչպես ՌԴ-ի դեպքում էր, նման երկխոսությունը ծավալում ենք մեր բոլոր կարևորագույն գործընկերների հետ։ Արտաքին գործերի նախարարի՝ Մոսկվա այցի օրերին արտաքին գործերի փոխնախարարը գտնվում էր Թեհրանում՝ նույնպես քննարկելու մեր ամբողջ օրակարգային հարցերը:

Նույն դինամիկան ունենք Չինաստանի և Հնդկաստանի հետ: Այս պահին չեմ կարող ձեզ տրամադրել ավելի մանրամասն ինֆորմացիա, բայց վստահեցնում եմ, որ դիվերսիֆիկացումը, բալանսավորված քաղաքականությունը մնում է մեր քաղաքականության հիմնական ուղղությունը: Բոլոր ուղղություններով մեր նախաձեռնությունները և ակտիվությունը փորձում են ապահովել մեր ազգային շահերը և ավելի բարենպաստ պայմանների ստեղծում»,- ասաց նա։