Հայաստանի ղեկավարությունն ինձնից նեղացած է, քանի որ Ադրբեջանին եմ աջակցել․ Լուկաշենկո

Բելառուսի նախագահ Ալեքսանդր Լուկաշենկոն խոսել է նաև Բելառուսի նկատմամբ Հայաստանի ղեկավարության դժգոհության մասին, հաղորդում է  ԲԵԼՏԱ–ն։

«Նրանք ինձնից նեղացած են, քանի որ Ադրբեջանին եմ աջակցել։ Աստված ձեզ հետ, ես միշտ սատարել եմ ողջախոհությունը, ես կողմ եմ եղել, որ պատերազմ չլինի, մենք իրար հետ չկռվենք»,- ասել է նա։

Լուկաշենկոն նշել է, որ ժամանակին միջնորդական գործառույթ է իրականացրել Ադրբեջանի և Հայաստանի ղեկավարների միջև՝ փորձելով նպաստել տարածքային վեճի խաղաղ կարգավորմանը։ Իսկ Ադրբեջանի նախագահ Իլհամ Ալիևն առաջարկել է տնտեսական համագործակցություն և ներդրումներ։ «Ալիևն անգամ Հայաստանի հետ պատերազմելու նպատակ չի ունեցել»,- ասել է Բելառուսի ղեկավարը։

«Այն, ինչ տեղի ունեցավ, Հայաստանի ղեկավարության մեղքով է, միայն նրանց մեղքով»,- ընդգծել է նա։

«Ավելին, ինքը՝ ՀՀ վարչապետ Նիկոլ Փաշինյանը, իր հայտարարություններում ընդունել է Ադրբեջանի նկատմամբ տարածքային հավակնությունները, երբ դա կարող էր չանել։ «Փաշինյանն ինքը հրաժարվեց Լեռնային Ղարաբաղից։ Թեև այդ պահին Իլհամը պատրաստ էր համաձայնել, որ դա տարածք է, որտեղ Հայաստանը լուրջ ազդեցություն կունենա»,- ասել է պետության ղեկավարը։

Լուկաշենկոն նաև ընդգծել է, որ ինքը լավ վերաբերմունք է ունեցել և ունի Հայաստանի ու հայ ժողովրդի նկատմամբ։

Նա չի հերքել, որ Բելառուսն Ադրբեջանին զենք է վաճառել՝ ընդգծելով, որ բաց են եղել նաև Հայաստանի համար: «Ով փող է վճարել, նա էլ ապրանք է ստացել», - ասել է Լուկաշենկոն: