Թուրքիայում լեռնադահուկային հանգստավայրում բռնկված հրդեհից հայտնի հեռուստահաղորդավար է մահացել

Թուրք հայտնի հեռուստահաղորդավար և ֆինանսական խորհրդատու Նեդիմ Թուրքմենը մահացել է թուրքական լեռնադահուկային հանգստավայրում գտնվող Grand Kartal հյուրանոցում բռնկված հրդեհի հետևանքով։ Այս մասին հաղորդում է Bloomberg HT հեռուստաալիքը, որի հաղորդումներին հաղորդվարը մասնակցել է որպես վերլուծաբան և մեկնաբան։

Հոդվածում նշվում է, որ զոհ են դարձել նաև լրագրողի կինը և նրանց երկու երեխաները՝ 22-ամյա որդին և 18-ամյա դուստրը։

Grand Kartal հյուրանոցում հրդեհը տեղի է ունեցել հունվարի 21-ի գիշերը։ Հրդեհի պահին 12 հարկանի շենքում եղել է 238 բնակիչ, այդ թվում՝ երեխաներ ունեցող ընտանիքներ։ Նրանցից շատերը եկել են հանգստավայր՝ իրենց դպրոցական արձակուրդներն անցկացնելու։

Ինչպես հայտնում են լրատվամիջոցները, հյուրանոցում ահազանգ չի հնչել։ Այդ պատճառով՝ մարդիկ մինչև վերջ չեն իմացել հրդեհի մասին և հետագայում չեն կարողացել փախչել շենքից։ Ավելին, արտակարգ իրավիճակների ծառայությունները դեպքի վայր են ժամանել հրդեհի բռնկվելուց 1 ժամ 15 րոպե անց։

Վերջին տվյալներով՝ հրդեհի հետևանքով, ընդհանուր առմամբ, 79 մարդ է զոհվել։

Հետաքննության շրջանակներում՝ ձերբակալվել է 18 քաղաքացի։ Բերման ենթարկվածների թվում են մի շարք պաշտոնյաներ և հյուրանոցի սեփականատերը։