Երգ, պար, թատերական խաղ․ ինչո՞ւ է «Hi Arev» խումբը նոր մոտեցումներ ցուցաբերում

 Հայաստանում օրեցօր ավելի արդիական եւ պահանջված են դառնում մյուզիքլային բեմադրությունները, որտեղ շեշտը դրվում է երգի, պարի եւ թատերական խաղի միաձուլմանը, ինչը նկատելի է գրեթե բոլոր միջոցառումների ժամանակ։ Հենց մյուզիքլին բնորոշ ձեւաչափով աչքի է ընկնում «Hi Arev» անսամբլը, որը գործում է 2018 թվականից՝ Թագուհի Գեւորգյանի ղեկավարությամբ։

Անսամբլում սովորում են ձայնային եւ պարային տվյալներ ունեցող 4-15 տարեկան երեխաներ, որոնք հետագայում կարող են հանդես գալ թե՛ խմբերի կազմում, թե՛ որպես անհատ։ Խմբի սաները հանդես են եկել Ամանորյա տարբեր ներկայացումների ժամանակ, ինչպես նաեւ մասնիկն են դարձել Հանրապետության Հրապարակում գլխավոր տոնածառի լույսերի վառմանն ուղեկցող հեքիաթային մյուզիքլային միջոցառումներին։ Նրանք նաեւ մասնակցություն ունեն Ամանորյա մեկ այլ հեքիաթի, որը կոչվում է «Ձմեռային այգի»․ տեսահոլովակը լույս է տեսել 2024 թվականին, որը երազանքի իրականացման ու հրաշքի մասին է։

Այս տարի Գ. Սունդուկյանի անվան ազգային ակադեմիական թատրոնում ցուցադրվեց «Մարդուկ Ջարդուկը» մանկական ինտերակտիվ ներկայացումը, որտեղ ներգրավված էին «Hi Arev»-ի սաները։ Խմբի սաներին հանդիսատեսը կարող է նաեւ հիշել «Էրեբունի-Երևան 2806» տոնակատարության օրը Հանրային հեռուստաընկերության ուղիղ եթերում, երբ նրանք կատարեցին «Երևան իմ տուն» երգը` շրջելով Երևանի փողոցներում։ «Ինչպես Հայաստանի բեմերում, այնպես էլ սփյուռքում մենք ներկայացնում ենք միշտ բազմաժանր երաժշտական համերգ-ներկայացումներ թե՛ հայրենասիրական, թե՛ այլ թեմաներով։ Խմբի յուրաքանչյուր անդամ նախ անհատ կատարող եւ պարող է դառնում, հետո նաեւ միասնական աշխատելու ունակություններով աչքի ընկնող մարդ։

Շատ կարեւոր է, որ բեմի մարդիկ միեւնույն ժամանակ կարողանանան երգել, պարել, ունենան բեմական խոսք եւ պահվածք, քանի որ հանդիսատեսը սպասում եւ ակնկալում է դա նրանցից»,-նշում է ղեկավար Թագուհի Գեւորգյանը։ Խմբի սաների անցած ճանապարհը հետաքրքիր է․ եղել են համագործակցություններ տարբեր սիրված արտիստների հետ, Հայաստանում գրեթե բոլոր մեծամասշտաբ միջոցառումներին ունեցել են մասնակցություն, ինչպես նաեւ շրջագայություններ տարբեր երկրներում։ Թեհրանի Հայոց Թեմի Բարեխնամ Առաջնորդ` Գերաշնորհ Տ. Սեպուհ Ս. Արք. Սարգսեանի բարձր հովանավորությամբ՝ Հայաստանից «Hi Arev» խմբի սաները մասնակցել են «Զարթոնք» պարախմբի 30-ամյակին եւ Հովհաննես Թումանյանի ծննդյան 150-֊ամյակին նվիրված միջոցառումներին` «Չարի վերջը» երաժշտական ներկայացումով։

Դե իսկ 2024-ի հունիսի 1-ին ընդառաջ, 15 տարվա ընդմիջումից հետո, վերաթողարկվեց հանրահայտ հունիսմեկյան երգը` հին և նոր սերնդի կատարմամբ, ինչպես նաեւ խմբի սաները Հարութ Փամբուկչյանի (Ձախ Հարութ) հետ հանդես եկան «Հայաստանի բալիկներ» երգով։ Գյումրու քաղաքապետարանի մշակույթի վարչության հրավերով` «Hi Arev» -ի սաներն իրենց մասնակցությունն ունեցան նաեւ Երեխաների պաշտպանության օրվա համար կազմակերպված տոնակատարությանը։ «Hi Arev»-ի սաներն իրենց կրթությունը ստանում են ոլորտի պրոֆեսիոնալ մասնագետների կողմից, որոնք իրենց հերթին անցել են երկար ճանապարհ եւ ունեն մասնագիտական կրթություն։

Երեխաները սովորում են ոչ միայն պար եւ վոկալ, այլ բեմական ոճաբանություն, խոսք եւ այլն։

Վարդուհի Տերտերյան