Ազգային հերոսից՝ մեղադրյալ․ բանակի հիմքում կանգնած գեներալների ու զինվորականների ճակատագիրը

«Մեզ անհրաժեշտ է ուժեղ և պրոֆեսիոնալ բանակ»,-  այս խոսքերը հորջորջող ՀՀ գերագույն գլխավոր հրամանատար Նիկոլ Փաշինյանին հակադրվում են նրա արարքներն ու բանակի նսեմացումը հնարավոր բոլոր ձևերով՝ սկսած պատերազմի պարտությունից, դրան հաջորդող քրեական գործերն ընդդեմ բանակի, Հայոց բանակի հիմքում կանգնած և բանակը կազմավորած զինվորականների ու գեներալների։ 

Փորձենք հիշել Հայոց բանակի ձևավորման ակունքներում կանգնած գեներալներին ու զինվորականներին, որոնց Փաշինյանն ի վերջո տարավ կալանքի։ Ոմանց դեպքում գեներալի, «Ազգային հերոսի» բարձրագույն կոչմանն արժանացնելուց կես տարի անգամ չանցած՝ անվանարկեց տարբեր մեղադրանքներով․․․ զինվորականների դատավարություններին թիվ ու սահման չկա։ 

Թերևս վերջին դեպքը տարեսկզբին ազգային հերոս Տիրան Խաչատրյանի ձերբակալությունն էր՝ 44-օրյա ռազմական գործողությունների հետ կապված դրվագներով։ Ի դեպ, 2020թ-ի հոկտեմբերին այդ նույն գործողությունների համար գերագույն գլխավոր հրամանատարը Տիրան Խաչատրյանին պարգևատրեց «Ազգային հերոսի» շքանշանով, իսկ այժմ նույն անձի արդարադատությունը ձերբակալում է այդ նույն գործողությունների հետ կապված դրվագներով։ Հարց է առաջանում, եթե Տիրան Խաչատրյանը «հանցագործ» է,  ինչպե՞ս ստացվեց, որ արժանացավ բարձրագույն շքանշանի։ 

2018-ին տեղի ունեցած իշխանափոխությունից հետո Փաշինյանի արդարադատության նշանառության տակ հայտնվեցին մի շարք գեներալներ, զինվորականներ, հերոսներ։ Շղթան սկսեց  գեներալ Մանվել Գրիգորյանին վարկաբեկող  քրգործով և այդ ժամանակ ՀԱՊԿ գլխավոր քարտուղար, գեներալ  Յուրի Խաչատուրովի սկանդալային գործով,  շատ չանցած թիրախում հայտնվեց Արցախի ԱԱԾ պետ գեներալ Արշալույս Ղարամյանը, հետո Արցախի նախկին քարտուղար Վիտալի Բալասանյանն ու ՊԲ նախկին հրամանատար Լևոն Մնացականյանը, ապա էստաֆետը փոխանցվեց Խաչատուրովի որդի գեներալ Գրիգորի Խաչատուրովին, Պաշտպանության նախկին նախարար Դավիթ Տոնոյանին, ով պաշտոնանկ արվեց 44-օրյա պատերազմից հետո, ավելի ուշ պարտություն կրած ԳՇ պետ Արտակ Դավթյանին, ԶՈւ հրթիռային զորքերի և հրետանու նախկին վարչության պետ, գեներալ-մայոր Արմեն Հարությունյանին, 5-րդ բանակային կորպուսի նախկին հրամանատար Անդրանիկ Փիլոյանին, Արցախի ՊԲ նախկին հրամանատար, գեներալ-լեյտենանտ Ջալալ Հարությունյանին, ՊԲ նախկին հրամանատար Միքայել Արզումանյանին, ՀՀ ԶՈՒ գլխավոր շտաբի նախկին պետ Օնիկ Գասպարյանին, ՀՀ պաշտպանության նախկին նախարար Վիգեն Սարգսյանին։