ԵՄ-ն հավանություն է տվել Պուտինի համար տրիբունալի նախագծին

Եվրոպայի խորհուրդը համաձայնություն է ձեռք բերել Ուկրաինայի դեմ ագրեսիայի հանցագործության համար Հատուկ տրիբունալի ստեղծման իրավական հիմքերի վերաբերյալ։ Այս մասին հայտնում է BBC-ի ռուսական ծառայությունը։ Եթե ​​տրիբունալը ստեղծվի, այն անկախ կլինի Միջազգային քրեական դատարանից։

Ագրեսիայի հանցագործությունը միջազգային հանցագործությունների առանձին կատեգորիա է, որը բաղկացած է մեկ այլ պետության դեմ պատերազմ սանձազերծելուց։ Ի տարբերություն ռազմական հանցագործությունների և մարդկության դեմ հանցագործությունների, որոնց համար կարող են պատասխանատվության ենթարկվել և՛ հակամարտության սովորական մասնակիցները, և՛ երկու կողմերի հրամանատարները, ագրեսիայի հանցագործությունը կարող է վերագրվել միայն հարձակման որոշում կայացրած երկրի բարձրագույն ղեկավարությանը։ Այսպիսով, եթե տրիբունալ ստեղծելու մասին որոշում կայացվի, ապա դրա աշխատանքն առաջին հերթին կվերաբերի Վլադիմիր Պուտինին։

ԵՄ արտաքին գործերի և անվտանգության քաղաքականության գերագույն ներկայացուցիչ Կայա Կալլասը հայտարարել է, որ «չի կասկածում, որ Պուտինը ագրեսիայի հանցագործություն է կատարել»՝ որոշելով հարձակվել Ուկրաինայի վրա և խախտել նրա ինքնիշխանությունը։ «Նա այս մասին խոսել է բավականին բացահայտ»,- Կալլասի խոսքերն է մեջբերում DW-ն։