ԵՄ-ն արդեն իսկ Հայաստանից պահանջում է հակառուսական քաղաքականություն. Գալուզին

Եվրամիությունը Հայաստանից արդեն իսկ պահանջում է միանալ հակառուսական պատժամիջոցներին՝ դրա դիմաց Երևանին կոնկրետ որևէ բան չխոստանալով։ Այս մասին «Известия»-ին տված հարցազրույցում հայտարարել է ՌԴ ԱԳՆ ղեկավարի տեղակալ Միխայիլ Գալուզինը։

«Ինչ վերաբերում է Հայաստանի և Եվրամիության միջև տարբեր նախագծերի շուրջ բանակցություններ սկսելու հարցին՝ հօգուտ մերձեցման և, մասնավորապես, առանց վիզայի ռեժիմի, ապա, այո, նման բանակցություններ սկսվել են։ Մենք տեսնում ենք, որ Եվրամիությունն այստեղ էլ հավատարիմ է ինքն իրեն, քանի որ առանց որևէ խոստում տալու կամ առանց վիզայի հարաբերությունների պլանում որևէ լուրջ որոշում ընդունելու, արդեն իսկ պահանջում է Հայաստանից քաղաքական լոյալություն և միանալ հակառուսական պատժամիջոցներին», - նշել է նա։

Փոխարտգործնախարարը հիշեցրել է նաև, որ Մոսկվան Երևանին հստակ մատնանշել է Եվրասիական տնտեսական միությանը և Եվրամիությանը միաժամանակյա անդամակցության անհնարինությունը։ «Սրանք բոլորովին տարբեր համակարգեր են, և դրանցում միաժամանակ լինելն ուղղակի անհնար է»,- ընդգծել է Գալուզինը` հավելելով, որ ԵԱՏՄ-ին Հայաստանի անդամակցությունը երկրին բերում է «շոշափելի և նշանակալի երկարաժամկետ օգուտներ՝ առևտրի աճի և ներդրումների ավելացման տեսքով»։