ՀՀ–ում ՌԴ դեսպան Սերգեյ Կոպիրկինը բացառել է Հայաստանի միաժամանակյա անդամակցությունը ԵԱՏՄ-ին և ԵՄ-ին

Հայաստանի միաժամանակյա անդամակցությունը ԵԱՏՄ-ին և ԵՄ-ին ոչ գործնականում, ոչ տեսականորեն հնարավոր չէ, «ՌԻԱ Նովոստի»-ին տված հարցազրույցում ասել է Երևանում ՌԴ դեսպան Սերգեյ Կոպիրկինը։

Նրա խոսքով՝ Ռուսաստանը հարգում է Հայաստանի ինքնիշխան իրավունքը՝ ընտրելու իր արտաքին քաղաքականությունը և արտաքին տնտեսական գործընկերներին։

«Միևնույն ժամանակ, Հայաստանի՝ ԵԱՏՄ-ին զուտ կամավոր անդամակցությունը ուղեկցվում է եվրասիական ինտեգրացիոն գործընթացների շրջանակներում որոշակի պարտավորություններով։ Ինչպես բազմիցս նշել են ռուս պաշտոնյաները, մասնավորապես, ՌԴ փոխվարչապետ Ալեքսեյ Օվերչուկը, ԵԱՏՄ-ին և ԵՄ-ին միաժամանակյա անդամակցությունը, այսինքն՝ լիարժեք մասնակցությունը և՛ եվրասիական, և՛ եվրոպական ինտեգրացիոն գործընթացներին, գործնականում կամ տեսականորեն անհնար է»,– ասել է դիվանագետը։

Ընդ որում, նա նշել է, որ եվրոպական մի շարք երկրների ներկայացուցիչներ բացահայտ հայտարարում են, որ Հայաստանը պետք է դուրս գա ԵԱՏՄ-ից դեռևս չերաշխավորված եվրոպական անդամակցություն ստանալուց առաջ, այսինքն՝ փլուզի տնտեսական կապերը Ռուսաստանի հետ՝ առանց որևէ համարժեք փոխհատուցման։