Էրդողանը Իսրայելին կոչ է անում փոխհատուցել Պաղեստինի վնասները

Թուրքիայի նախագահ Ռեջեփ Թայիփ Էրդողանը հայտարարել է, որ Իսրայելը պետք է փոխհատուցի պաղեստինցիներին այն վնասի համար, որը նրանց պատճառել է մարտերի և օկուպացիայի ժամանակ։ Այս մասին նա ասել է Մալայզիայում կայացած մամուլի ասուլիսում՝ երկրի վարչապետ Անվար Իբրահիմի հետ բանակցություններից հետո։

«Մենք հանգամանորեն քննարկել ենք միջազգային խնդիրները, հատկապես՝ պաղեստինյան հարցը, խնդրի առանցքն այն է, որ Իսրայելը համառորեն վարում է օկուպացիայի, նվաճման ու կոտորածի քաղաքականություն։ Ինչպես նախկինում, Իսրայելը չկարողացավ կատարել վերջին հրադադարի համաձայնագրով իր խոստումները: Այն պետք է վերջ տա պաղեստինյան հողերի օկուպացիային և փոխհատուցի պատճառված վնասը»,- ասել է Էրդողանը, որի ելույթը հեռարձակվել է թուրքական հեռուստաալիքներով։

«Թուրքիան և Մալայզիան կշարունակեն Պաղեստինին աջակցելու իրենց ջանքերը, մինչ այժմ Թուրքիան օգնության հարյուրից ավելի նավ է ուղարկել Պաղեստին։ Օգնության տրամադրումը շարունակվում է։ Մենք նաև բարձր ենք գնահատում Մալազիայի դիրքորոշումը Գազայի և Պաղեստինի հարցում»,- հավելել է Էրդողանը։