Ինչ նոր միջոց է Թրամփը գտել Ուկրաինային օգնելու համար

ԱՄՆ նախագահ Դոնալդ Թրամփի վարչակազմը մտադիր է խնդրել իր եվրոպացի դաշնակիցներին մեծացնել ամերիկյան զենքի գնումները՝ դրանք Ուկրաինա տեղափոխելու համար։ Այս մասին երկուշաբթի հայտնել է Reuters գործակալությունը։

Նրա աղբյուրների համաձայն՝ «Թրամփի վարչակազմը ծրագրում է մղել եվրոպացի դաշնակիցներին՝ Մոսկվայի հետ հնարավոր խաղաղ բանակցություններից առաջ մեծացնել ամերիկյան զենքի գնումները Ուկրաինայի համար»։

Ինչպես նշվում է հրապարակման մեջ, Ռուսաստանի և Ուկրաինայի հարցերով Թրամփի հատուկ բանագնաց Քիթ Քելոգը մտադիր է այս ծրագիրը քննարկել եվրոպացիների հետ Մյունխենի անվտանգության համաժողովի շրջանակներում, որը կանցկացվի փետրվարի 14-ից 16-ը։ 

Գործակալությանը տված հարցազրույցում Քելլոգը չի հաստատել այս պլանի առկայությունը։ Նա նաև ընդգծել է. «ԱՄՆ-ը միշտ ցանկանում է վաճառել ամերիկյան արտադրության զենք, քանի որ դա ուժեղացնում է մեր տնտեսությունը։ Տարբերակները շատ են, բոլորը ներկայումս քննարկվում են»,- հավելել է նա:

Հատուկ բանագնացը նշել է, որ զենքը շարունակում է առաքվել Ուկրաինա, որի առաքումը հաստատվել է Բայդենի օրոք։