Ոստիկանների հետ առերեսում է եղել՝ նրանք կտրուկ հրաժարվել են իրենց արածից․ «Հրապարակ»

«Հրապարակ» թերթը գրել է․ 

Երեւանի ընդհանուր իրավասության քրեական դատարանը՝ դատավոր Ժորա Չիչոյանի նախագահությամբ, նախորդ տարվա ապրիլի 18-ին որոշեց «Քաղաքացիական պայմանագիր» խմբակցության պատգամավոր Հակոբ Ասլանյանի հետ տրանսպորտում վիճաբանած Սամվել Վարդանյանի նկատմամբ տնային կալանք եւ 7 մլն դրամ գրավ սահմանել: Ընդդիմադիր երիտասարդը տեւական ժամանակ տնային կալանքի տակ մնաց, այն պատճառով, որ նախկին ՔՊ-ական Հակոբ Ասլանյանին, որն այժմ հայտարարում է, որ ընդդիմադիր է, անվանել էր «հակահայ վիժվածք»: Սամվել Վարդանյանին նույն օրը ձերբակալել էին եւ կեսգիշերին քննչական վարչությունից տեղափոխել ձերբակալվածների պահման վայր: Վարչության շենքից 1-2 րոպե հեռանալուց հետո ուղեկցող երկու ոստիկանները միաժամանակ «բնական կարիքները» հոգալու անհրաժեշտություն էին զգացել եւ Սամվելին թողել էին ավտոմեքենայի մեջ ու գնացել «կարիքները հոգալու»: Ապա ինչ-որ դիմակավորված անձինք բարձրացել էին մեքենա, ձեռնաշղթաներով կապված Սամվելին հանել ավտոմեքենայից, տարել մի կողմ` ծեծի ենթարկել, խոշտանգել, նվաստացրել՝ պատճառելով մարմնական վնասվածքներ: Դիմակավորված անձինք պահանջել էին, որ Սամվելը կրկնի իր հասցեին ասված սեռական բնույթի հայհոյանքները, նա հրաժարվել էր, ինչից հետո թքել էին տղայի վրա: 

Դեպքի մասին հայտնի դարձավ ապրիլի 16-ին` ԱԺ պատգամավորները տեսակցության էին գնացել Սամվելին, եւ նա պատմել էր կատարվածի մասին: Ապա փաստաբաններն ասուլիս տվեցին` պատմեցին այդ սահմռկեցուցիչ դեպքի մասին, մեծ հանրային աղմուկ բարձրացավ, եւ դեպքից օրեր անց Քննչական կոմիտեն ստիպված եղավ վարույթ նախաձեռնել` Սամվել Վարդանյանին խոշտանգելու դեպքով, ինչն աննախադեպ է անգամ Հայաստանի նման անօրինական երկրում: 

Գրեթե մեկ տարի է անցել դեպքից, սակայն Սամվել Վարդանյանին խոշտանգելու գործը մեկ միլիմետր առաջ չի գնացել` Քննչական կոմիտեն չի կարողացել գտնել դիմակներով սադիստներին, որեւէ մեկը պատասխանատվության չի ենթարկվել, հայտնի չէ, թե ովքեր են եղել նրան ուղեկցող ոստիկանները, որոնք խոշտանգողներին ոչ պակաս հանցանք են կատարել: Մեր աղբյուրներն ասում են, որ խոշտանգող դիմակավորվածներն էլ են եղել ոստիկանության աշխատակիցներ, այլ պարագայում անհնարին է, որ ոստիկանները ձերբակալված անձին հանձնեին նրանց հաշվեհարդարին: 

Սամվել Վարդանյանը «Հրապարակի» հետ զրույցում ասում է, որ հույս չունի, թե իրավապահները համարձակություն կունենան իշխանությունների դեմ դուրս գալ: Քննչական կոմիտեից էլ մեզ մի հերթապահ նախադասություն փոխանցեցին. «Փորձագիտական եզրակացությունները դեռեւս չենք ստացել, այս պահին ընթանում է նախաքննություն, նորություն չկա»: 

Փաստորեն, մեկ տարին բավարար չի եղել անգամ փորձաքննությունների եզրակացությունը ստանալու համար, իսկ երբ իշխանություններին անհրաժեշտ է` նախաքննությունն ավարտում են մի քանի օրում եւ արագ դատավճիռ կայացնում, ինչպես արեցին, օրինակ, 44-օրյա պատերազմում զոհված հերոսի հորը` Գարիկ Գալեյանին դատելիս: Մեկ շաբաթում դատեցին նաեւ զոհվածի մորը` Գայանե Հակոբյանին: Սամվել Վարդանյանը, մեզ հետ զրույցում անդրադառնալով տեղի ունեցածին եւ տեղում դոփող քրեական վարույթին, ասում է. «Ես չեմ էլ սպասում, որ այս գործն առաջ է գնալու, տեղից շարժվելու է` այս իշխանությունների օրոք, որովհետեւ իշխանությունները հաստատ իրենք իրենց դեմ դուրս չեն գա: Իսկ ինչո՞ւ չպետք է այսքան բացահայտ գործեն, եթե տեղի է ունենում նման սահմռկեցուցիչ դեպք: Ոստիկանների հետ առերեսում է տեղի ունեցել միայն, կտրուկ հրաժարվում են իրենց արածից: Ամեն դեպքում ես ուզում եմ ասել, որ այս դեպքը չեմ մոռացել ու չեմ մոռանալու: Վստահաբար, ես պայքարելու եմ արդարության համար, ոչինչ չի մոռացվելու: Այժմ ոչինչ տեղի չի ունենում` գործի շրջանակներում: Դեպքից մոտ երեք շաբաթ անց միայն տեղի ունեցավ առերեսում, ու վերջ, դրանից հետո այս գործը խոր քուն է մտել, բոլորիս հասկանալի պատճառներով»: 

Դեպքի «հերոսը»` Հակոբ Ասլանյանը, այժմ ընդդիմադիր է իրեն համարում, չե՞ք ցանկանում խոսել նրա հետ, գուցե զղջո՞ւմ է կատարվածի համար՝ հարցրինք Սամվելին։ «Բացառվում է, որ իր հետ խոսեմ: Հակոբ Ասլանյանի խաղերին էլ չեմ հավատում ընդհանրապես: Ես նրա հետ խոսելու ոչինչ չունեմ: Թող գործը գնա մինչեւ վերջ: Ես մտահոգվելու պատճառ չունեմ: Դատախազն ամեն ինչ անում է, որ ես խիստ պատժի արժանանամ, սակայն ես ինչ որ արել եմ, ճիշտ եմ արել, չեմ զղջում իմ արածի համար: Շատ ծիծաղելի է «ընդդիմադիր» եւ «Հակոբ Ասլանյան» բառերն իրար կողքի դնելը: Փաստորեն, ես էլ եմ ընդդիմադիր, նա էլ: Չի կարող նման բան լինել, մենք չենք կարող նույն հարթության վրա լինել»,- ասաց նա: