Մեդվեդևը գնահատել է Զելենսկու` Ռուսաստանի հետ տարածքներ փոխանակելու մասին խոսքերը

ՌԴ Անվտանգության խորհրդի փոխնախագահ Դմիտրի Մեդվեդևը անհեթեթություն է անվանել Ուկրաինայի նախագահ Վոլոդիմիր Զելենսկու խոսքերը Ռուսաստանի Դաշնության հետ տարածքներ փոխանակելու մասին։ Համապատասխան գրառումը հրապարակվել է Մեդվեդևի Telegram ալիքում։

Մեդվեդևը նշել է, որ «խաղաղություն ուժի միջոցով» հասկացությունը երբեմն աշխատում է, օրինակ՝ ցույց տալով ուժերի իրական հավասարակշռությունը, ինչպես դա տեղի ունեցավ փետրվարի 12-ին Կիևում՝ ռուսական հրթիռների և անօդաչու սարքերի ժամանումից հետո։ Միևնույն ժամանակ, պաշտոնյան կարծում է, որ նույնիսկ նման գործողություններն ի վիճակի չեն «մաքրել ոչ լեգիտիմ գոմեշների միտքը», որոնք «դիտողների առաջ անհեթեթություն են ասում տարածքների փոխանակման մասին»։

Ըստ Մեդվեդևի՝ նման մարդկանց բուժվելու միայն մեկ միջոց կա՝ «ինքդ քեզ նորից ռուս զգալ»։

The Guardian-ին տված հարցազրույցում Զելենսկին, ինչպես հայտնել ենք, ասել է, որ ծրագրում է առաջիկա խաղաղ բանակցությունների շրջանակում  Ուկրաինայի զինված ուժերի կողմից օկուպացված Կուրսկի շրջանը փոխանակել ռուսական զորքերի կողմից օկուպացված տարածքների հետ: Նա հավելել է, որ դեռ չի որոշվել, թե կոնկրետ ինչ տարածք է խնդրելու Ուկրաինան դրա դիմաց։