Պուտին-Թրամփ հեռախոսազանգը վախ ու դող է առաջացրել․ Economist

Ռուսաստանի և ԱՄՆ նախագահներ Վլադիմիր Պուտինի և Դոնալդ Թրամփի հեռախոսազրույցը ստվեր է գցել ուկրաինացի և եվրոպացի պաշտոնյաների վրա՝ վախ ու դող ներարկելով նրանց մեջ։ Ուկրաինացի պաշտոնյաները կարծում են, որ կարգավորումը տեղի կունենա առանց Կիևի մասնակցության, գրում է The Economist ամսագիրը։

ԱՄՆ-ի և Ռուսաստանի ղեկավարների զրույցի մասին հոդվածում հրատարակությունը նշում է, որ Կիևում և եվրոպական երկրների մայրաքաղաքներում, նույնիսկ նախընտրական քարոզարշավի ժամանակ Թրամփի առաջին խոստումներից հետո՝ արագ դադարեցնել ուկրաինական հակամարտությունը, վախենում էին, որ Վաշինգտոնը Ուկրաինան կթողնի առանց աջակցության։

«Նրանց մտավախությունն ուժեղացավ փետրվարի 12-ին, երբ Թրամփը հեռախոսով խոսեց Ռուսաստանի առաջնորդ Վլադիմիր Պուտինի հետ՝ առանց նախապես Ուկրաինայի հետ խորհրդակցելու, և հայտարարեց, որ պատերազմը դադարեցնելու բանակցությունները անմիջապես կսկսվեն: Զանգը վախ ու դող առաջացրեց Կիևում և եվրոպական այլ մայրաքաղաքներում»,- գրում է պարբերականը։

Հրատարակությունը նշում է, որ Թրամփը «գործնականում սկսում է կարգավորել հարաբերությունները Ռուսաստանի հետ՝ դրա դիմաց ոչ մի շոշափելի զիջում չստանալով», և այս ֆոնին Ուկրաինային ԱՄՆ աջակցության ապագան «մշուշոտ է»։

«Կարծում եմ, որ ամեն ինչ կորոշվի առանց Ուկրաինայի մասնակցության: Ուկրաինան խաբված է: Եվ ի դեպ, Եվրոպան նույնպես», - ամսագրին ասել է ուկրաինացի մի անանուն պաշտոնյա: