Մասկը սկսել է քնել Սպիտակ տանը․ Fox Business

Իլոն Մասկն այնքան է նվիրված իր աշխատանքին՝ որպես ԱՄՆ Կառավարության արդյունավետության դեպարտամենտի (DOGE) ղեկավար, որ քնում է Սպիտակ տան իր գրասենյակում, հայտնում է Fox Business-ը։

«Մասկը իր շրջապատին ասել է, որ նախատեսում է չորս ամիս աշխատել DOGE-ի ղեկին։ Նա մտադիր է բյուջեն կրճատել 2 տրիլիոն դոլարով, ինչը կհանգեցնի նրան, որ գնաճը կսահմանվի 2%: Մասկը ասել է, որ այնքան շատ է աշխատում DOGE-ում, որ քնում է Սպիտակ տան իր գրասենյակում»,- հաղորդում է պարբերականը։

Չի նշվում, թե կոնկրետ որտեղ է գտնվում Մասկի գրասենյակը՝ անմիջապես Սպիտակ տանը՝ ԱՄՆ նախագահ Դոնալդ Թրամփի հետ նույն տանիքի տակ, թե՞ հարևան վարչական շենքերում։

Մասկի՝ աշխատանքի վայրում քնելու սովորությունը վաղուց հայտնի է: 2016 և 2018 թվականներին Tesla-ի նոր մոդելների թողարկման ժամանակ նա քնում էր գործարանի հատակին։ 2020 թվականին նա Twitter-ում հայտարարեց, որ վաճառելու է ողջ «ֆիզիկական գույքը» և մտադիր է անշարժ գույք չունենալ։ Այն ժամանակ հաղորդվում էր, որ նա յոթ առանձնատուն ունի Կալիֆորնիայում։ Ավելի ուշ հաղորդվեց, որ Մասկը միայն երկու սենյականոց փոքրիկ տուն է թողել Տեխասում:

2021 թվականին միլիարդատերն ասել է, որ ապրում է ռանչոյում, որը նույնպես Տեխասում է գտնվում։ Ըստ Մասկի՝ նա 50 000 դոլարով 3 սենյականոց տուն է վարձել իր SpaceX ընկերությունից։ 2024 թվականին հաղորդվել է, որ Մասկը ցանկացել է առանձնատուն կառուցել իր երեխաների համար, ինչի համար գնել է 35 միլիոն դոլար արժողությամբ անշարժ գույք։ Միլիարդատերը հերքել է այդ տեղեկությունը։

Սակայն այլ խոսակցություններ են ի հայտ եկել այն մասին, որ Մասկը մի ամբողջ քաղաք է կառուցում իր աշխատակիցների համար։