Իսրայելը կարող է հարվածել Իրանի միջուկային օբյեկտներին․ ԱՄՆ հետախուզություն
Համաշխարհային Մամուլ
ԱՄՆ հետախուզությունը նախազգուշացրել է, որ 2025 թվականին Իսրայելը կարող է հարվածել Իրանի միջուկային օբյեկտներին, գրում է Wall Street Journal-ը։
Հրատարակության աղբյուրների համաձայն՝ ԱՄՆ նախագահ Ջո Բայդենի վարչակազմի հետախուզությունը վերջին օրերին զեկույց է հրապարակել՝ եզրակացնելով, որ Իսրայելը դիտարկում է 2025 թվականին Իրանի միջուկային օբյեկտներին լայնածավալ հարվածներ հասցնելու հնարավորությունը՝ օգտվելով Իրանի «թուլությունից»։
Հետախուզությանը ծանոթ երկու մարդ ասել է, որ հետախուզությունը նաև եզրակացրել է, որ Իսրայելը կդրդի ԱՄՆ նոր նախագահ Դոնալդ Թրամփի վարչակազմին աջակցել հարվածներին՝ համարելով, որ նա դա անելու է ավելի մեծ հավանականությամբ, քան Բայդենը՝ վախենալով, որ Իրանի՝ միջուկային զենք ձեռք բերելու ենթադրյալ ջանքերը դադարեցնելու տարբերակները սպառվում են:
«ԱՄՆ հետախուզական հանրությունը Թրամփի վարչակազմի առաջին օրերին հրապարակել է երկրորդ զեկույցը, որում կրկին նշվում է, որ Իսրայելը դիտարկում է նման հարվածներ Իրանի միջուկային օբյեկտներին»,- գրում է հրատարակությունը՝ վկայակոչելով հետախուզությանը ծանոթ ամերիկացի պաշտոնյային:
Ամերիկացի զինվորական պաշտոնյաները նշել են, որ Իսրայելի խիստ ամրացված միջուկային օբյեկտների վրա հարձակումը, հավանաբար, կպահանջի ԱՄՆ ռազմական աջակցություն և զինամթերք, ավելացնում է թերթը:
ԱՄՆ նախագահը փետրվարի 5-ին ասել է, որ կցանկանար Իրանի հետ կնքել «ստուգված» միջուկային խաղաղության համաձայնագիր, որը թույլ կտա Իրանին զարգանալ և բարգավաճել խաղաղ ճանապարհով, և կոչ է արել անհապաղ սկսել աշխատանքները: Իրանի ԱԳՆ-ն կեղծ է անվանել Վաշինգտոնի հայտարարությունները Թեհրանի՝ միջուկային զենք ստեղծելու ցանկության մասին, հիշեցնում է ՌԻԱ Նովոստին։
