Թեհրանը Հայաստանի տարածքային ամբողջականության վերաբերյալ հստակ դիրքորոշում ունի․ Իրանի ԱԳՆ

Իրանի փոխարտգործնախարարի քաղաքական հարցերով տեղակալ Մաջիդ Թախտ-Ռավանչին, անդրադառնալով Հայաստանի տարածքային ամբողջականության վերաբերյալ Իրանի հստակ դիրքորոշմանը, հայտարարել է, որ Իրանի Իսլամական Հանրապետությունը շարունակում է պահպանել իր դիրքորոշումը տարածաշրջանի աշխարհաքաղաքականության անփոփոխության վերաբերյալ։

Թախտ-Ռավանչին հինգշաբթի օրը Հայաստանի արտակարգ և լիազոր դեսպան Գրիգոր Հակոբյանի հետ հանդիպմանը նշել է, որ Իրանի Իսլամական Հանրապետության արտաքին քաղաքականության մեջ առանձնահատուկ նշանակություն ունի Հայաստանի հետ հարաբերությունների զարգացումը, և դրա համար կան բոլոր անհրաժեշտ նախադրյալները։

Հակոբյանը, շնորհավորելով Իսլամական հեղափոխության հաղթանակի 46–ամյակի առթիվ, նշել է, որ Իրանի հետ փոխադարձ հարգանքի և վստահության վրա հիմնված հարաբերությունների խորացումն առանձնահատուկ նշանակություն ունի Հայաստանի կառավարության և ժողովրդի համար։

Հանդիպմանը քննարկվել են Հայաստանի և Իրանի միջև քաղաքական, տնտեսական և էներգետիկ ոլորտներում համագործակցությանն առնչվող հարցեր։ Կողմերը մտքեր են փոխանակել նաև տարածաշրջանային օրակարգի ընթացիկ հարցերի շուրջ։