Թրամփը Զելենսկուն է տվել իր հեռախոսահամարը և ասել՝ անմիջապես զանգահարի իրեն․ Axios

Փետրվարի 12-ին կայացած զրույցի վերջում ԱՄՆ նախագահ Դոնալդ Թրամփը Վլադիմիր Զելենսկուն է փոխանցել իր հեռախոսահամարը և ասել, որ նա անմիջապես զանգահարի իրեն։ Այս մասին հայտնում է ամերիկյան Axios պորտալը՝ վկայակոչելով աղբյուրներ։

Պորտալի զրուցակիցները պնդում են, որ ի պատասխան Թրամփի առաջարկի՝ Զելենսկին խոստացել է Ամերիկայի նախագահին տալ ուկրաինացի բռնցքամարտիկ Ալեքսանդր Ուսիկի չեմպիոնական գոտին։

Ընդհանուր առմամբ, Թրամփի և Զելենսկու զրույցը դրական էր, ասում են Axios-ի աղբյուրները։ Մի պահ Թրամփը Զելենսկուն ասել է, որ պետք է խոսի Ռուսաստանի նախագահ Վլադիմիր Պուտինի հետ «Ուկրաինան փրկելու համար»։

 Թրամփի խոսքով՝ Ռուսաստանի ղեկավարը լրջորեն է տրամադրված հակամարտության կարգավորման հարցում։ Թրամփը փորձել է Զելենսկուց պարզել՝ արդյոք նա դեռ ցանկանում է «գործարքի գալ» Ուկրաինայում իրավիճակի կարգավորման հարցում։

Զելենսկին պատասխանել է՝ ասելով, որ ցանկանում է համաձայնության գալ, բայց ընդհանուր առմամբ թերահավատ է։