Շմավոնին, իրավամբ, խաբել են․ փաստաբան Լևոն Բաղդասարյան

Փաստաբան Լևոն Բաղդասարյանն իր ֆեյսբուքյան էջում գրել է․

«Տարիներ առաջ սեփական այգուս ընկուզենիներն էի ջրում, ծառերից մեկի տակ ջուրը չէր լցվում, հոսում գնում էր։ Բահով մի փոքր փորեցի, տակից մի քանի օձի գլուխ երևացին։ Հարայ-հրոցս գցեցի, հարևանս զանգեց, երկու օձ բռնող եկան։ Հողը փորեցին, մեջից տասներեք հատ մեծ ու փոքր օձեր հանեցին։ Օձերին հանելուց հետո մի հատ մեծ պուտուկ, մի հատ էլ կաշվից պայուսակի պես բան հանեցին, բացեցին, մեջը գունավոր քարեր, ոսկի, իսկ այդ պայուսակի մեջ սպիտակ մեծ քարեր։ Դրանք էլ հավաքեցին, տարան, ասացին, որ հողի տակից հանած գանձերը քոնը չի, պետությանն է։

Հաջորդ օրը հարևանիս հետ գնացինք այդ մարդկանցից մեկին տեսանք,ասացինք՝ախպեր, բա մեզ ոչ մի բա՞ն։ Ասաց, ոնց որ լավ չես հասկացել, դա պետության սեփականությունն է, որ շատ դավադիտ անես, երեկ հողումդ կանեփի քոլեր տեսանք, քեզ կկալանավորենք։ Հարևանս հարցրեց, բա էդ ո՞նց է, որ գանձը պետությանն է, քոլը իմն է, եթե նույն տեղում են։ Պատասխանեց, թե լեզվիդ եք տալիս, երեկոյան ձեր ետևից օրգանը կգա։ Քոռ ու փոշման հետ դառանք, վախիցս տասը օր գնացի բաջանաղիս տուն։ Էս բաջանաղս էլ ժամանակին բանկում հերթապահ ոստիկան էր աշխատում, երբ իմացավ ինչն ինչոց է, խորհուրդ տվեց հանգիստ տեղս նստեմ։ Ասում է, նախկինում դատված ես, ոչ մեկ քեզ լուրջ չի ընդունի ու չի հավատա, գործ չունես։ Ամեն գիշեր երազիս էդ օձերն են գալիս, նայում աչքերիս, գլուխները տանում բերում են, տանում բերում են, քշում եմ, չեն գնում։ Մի խորհուրդ տվեք։

Պատասխան

Հարգելի քաղաքացուն պայմանական անվանենք Շմավոն։

Հարգելի Շմավոնին, իրավամբ, խաբել են։ Եթե խաբողը պետական մակարդակով է եղել, ինչը քիչ հավանական է, ուրեմն պետությունն է խաբել Շմավոնին, եթե ոչ, ապա տվյալ քաղաքացին շանտաժով ու խարդախությամբ տիրացել է Շմավոնի հարստությանը, քանի որ ներպետական օրենքով, իսկ դա քաղաքացիական օրենսգրքի 186 հոդվածն է, օրենսդիրը նախատեսում է, որ սեփական հողատարածքից հանված գանձի բացառիկ սեփականության իրավունքը պատկանում է տվյալ հողամասի սեփականատիրոջը, այսիննքն՝ Շմավոնին։ Այն դեպքում, երբ պարզվում է, որ գանձն իրենից ներկայացնում է պատմամշակույթային արժեք, ապա պետությունը պարտավոր է գանձի տիրոջը վճարել գանձի ամբողջ արժեքը։

Շմավոնին խորհուրդ եմ տալիս հայտարարություն տալ հանցագործության մասին։ Եթե Շմավոնն ունի վախեր, ապա կարող է դիմել փաստաբանի կամ պարտքի զիջում անել երրորդ անձի։
Ինչ վերաբերվում է իր սեփական այգում ենթադրյալ աճող թմրամիջոցներին, ապա, իրավամբ, իր այգում աճող արգելված թփերի պատասխանատուն ինքն է։ Դրանից ավել խորհուրդ ստանալու համար Շմավոնը կարող է դիմել այդ ոլորտի մասնագետ փաստաբանի, քանի որ Լեվ Գրուպ-ի փաստաբաններին արգելված է մասնագիտանալ թմրամիջոցների գործերով ծառայություններ մատուցելու։ Ավելին, հակված ենք օրենքի խստացմանը»: