Մակրոնը ՆԱՏՕ-ի գլխավոր քարտուղարին խնդրել է գրավել Արկտիկան

Ֆրանսիայի նախագահ Էմանուել Մակրոնը ՆԱՏՕ-ի գլխավոր քարտուղար Մարկ Ռյուտեին խնդրել է ռազմավարություն մշակել Արկտիկայի անվտանգության ապահովման համար։

Financial Times-ին տված հարցազրույցում նա անդրադարձել է Արկտիկայի անվտանգության թեմային՝ պատասխանելով ԱՄՆ նախագահ Դոնալդ Թրամփի՝ Գրենլանդիան միացնելու սպառնալիքի մասին հարցին։ «Արկտիկական ծովային ուղիների անվտանգության վերաբերյալ Թրամփի մտահոգությունները «հարգելի» են, սակայն պետք է համատեղ լուծվեն ՆԱՏՕ-ի դաշնակիցների կողմից»,-ասել է Ֆրանսիայի ղեկավարը։

«Ես խնդրել եմ ՆԱՏՕ-ի գլխավոր քարտուղար Մարկ Ռյուտեին ռազմավարություն մշակել Արկտիկայում անվտանգության ապահովման համար, այդ թվում՝ հնարավոր համատեղ ռազմական գործողությունների միջոցով»,- Մակրոնի խոսքը մեջբերում է հրատարակությունը։

2024-ի վերջին Թրամփը Միացյալ Նահանգների համար Գրենլանդիայի սեփականատեր լինելն անվանել է «բացարձակ անհրաժեշտություն»՝ մեկնաբանելով Շվեդիայում ԱՄՆ նախկին դեսպանին և ձեռներեց Քեն Հաուերին Դանիայում ԱՄՆ նոր դեսպան նշանակելու իր որոշումը:

Գրենլանդիան Դանիայի գաղութ է եղել մինչև 1953 թվականը։ Այն մնում է թագավորության մաս, սակայն 2009 թվականին ձեռք է բերել ինքնավարություն՝ իրեն կառավարելու և ներքին քաղաքականության մեջ ինքնուրույն ընտրություն կատարելու ունակությամբ։ 2019 թվականին լրատվամիջոցներում մի շարք հաղորդումներ են հայտնվել այն մասին, որ Թրամփը մտադիր է գնել Գրենլանդիան: