Հայաստանը կարող է տասնյակ տարիներ մնալ Եվրամիության շեմին. ուկրաինացի վերլուծաբան (տեսանյութ)

Եվրոպական ինտեգրումը երկարատև գործընթաց է, Հայաստանը կարող է տասնյակ տարիներ մնալ Եվրամիության շեմին, և դրան պետք է շատ սթափ ու իրատեսորեն վերաբերվել: Euromedia24-ին տված հարցազրույցում այս մասին նշեց ուկրաինացի հայտնի հրապարակախոս ու վերլուծաբան Վիտալի Պորտնիկովը՝  խոսելով Եվրամիությանն անդամակցելու Հայաստանի ղեկավարության ձգտումների մասին և ներկայացնելով եվրոպական ինտեգրման հարցում Ուկրաինայի փորձը:

Պորտնիկովի գնահատմամբ՝ Հայաստանի խորհրդարանի՝ այս շաբաթ ընդունած օրինագիծն, ըստ էության, հռչակագիր է Եվրոպական միությանն անդամակցելու Հայաստանի մտադրության մասին, և դա առաջին հերթին ենթադրում է վերադարձ ԵՄ-ի հետ Ասոցացման և Խորը ու համապարփակ ազատ առևտրի գոտու համաձայնագրին, որի շուրջ երրորդ նախագահ Սերժ Սարգսյանը մոտ 4 տարի բանակցեց, բայց այդպես էլ չստորագրեց:

Հիշեցնենք, որ փետրվարի 12-ին Ազգային ժողովը մեծամասնություն կազմող «Քաղաքացիական պայմանագիր» խմբակցության ձայների շնորհիվ առաջին ընթերցմամբ ընդունել է քաղաքացիական նախաձեռնության կարգով խորհրդարան ներկայացված՝ «Եվրոպական Միությանը Հայաստանի Հանրապետության անդամակցելու գործընթացի մեկնարկի մասին» օրենքի նախագիծը: Արտգործնախարարի տեղակալ Պարույր Հովհաննիսյանն ընդգծել էր, որ օրինագծի ընդունումն ինքնին չի հանդիսանում Եվրամիությանը Հայաստանի Հանրապետության անդամակցության հայտ:

Մանրամասները՝ տեսանյութում:

Հեղինակ՝ Արամ Սարգսյան