ԱՄՆ-ը, նախքան համատեղ հանդիպումը, առանձին հանդիպումներ կանցկացնի Ռուսաստանի և Ուկրաինայի հետ. NBC

ԱՄՆ-ը չի հրավիրել ուկրաինական պատվիրակությանը Սաուդյան Արաբիայում Ռուսաստանի հետ բանակցություններին, քանի որ Վաշինգտոնը նախատեսում է երկկողմանի հանդիպումներ ունենալ Մոսկվայի և Կիևի ներկայացուցիչների հետ առանձին, ապա համատեղ հանդիպում կազմակերպել։ Այս մասին հայտնում է NBC հեռուստաալիքը։

«Սա ցույց է տալիս, որ մենք հավասարապես ակտիվորեն համագործակցում ենք ինչպես Ռուսաստանի, այնպես էլ Ուկրաինայի հետ։ Մենք ցանկանում ենք վերջ տալ մահերին և շարժվել դեպի տևական խաղաղություն»,- ասել է հեռուստաալիքի զրուցակիցներից մեկը։

Ուկրաինայի նախագահին մոտ կանգնած NBC-ի աղբյուրը հաստատել է, որ Կիևը դեռևս չի հրավիրվել Սաուդյան Արաբիայում Վաշինգտոնի և Մոսկվայի հանդիպմանը։

Ռուսական և ամերիկյան պատվիրակությունները Սաուդյան Արաբիայում կհանդիպեն երեքշաբթի՝ փետրվարի 18-ին։ Ամերիկյան կողմի կազմում կլինեն պետքարտուղար Մարկո Ռուբիոն, հատուկ բանագնաց Սթիվ Ուիտկոֆը և ազգային անվտանգության հարցերով խորհրդական Մայք Վալցը։

Առաջիկա օրերին Սաուդյան Արաբիայում կլինի նաև Վոլոդիմիր Զելենսկին։ Օրերս նա պարզաբանել է, որ Կիևն այս հանդիպմանը ներկայացված չի լինելու։ Ուկրաինայի իշխանությունները պահանջել են, որ ամերիկյան կողմը նախ քննարկի կարգավորման հարցը Կիևի, իսկ հետո միայն Մոսկվայի հետ։

ԱՄՆ նախագահ Դոնալդ Թրամփին հարցրել են, թե արդյոք Զելենսկին կմասնակցի բանակցություններին։ Նա դրական է պատասխանել, սակայն չի մանրամասնել, թե ինչ հանդիպման մասին է խոսքը։ Հանրապետականը հայտարարել է նաև Սաուդյան Արաբիայում իր ռուս գործընկեր Վլադիմիր Պուտինի հետ «շատ շուտով» հանդիպման մասին։