ԱՄՆ ֆինանսների նախարարը Զելենսկուն մեկ ժամ է տվել՝ ուսումնասիրելու առաջարկը. Economist

ԱՄՆ ֆինանսների նախարար Սքոթ Բեսենտը Վլադիմիր Զելենսկուն ընդամենը մեկ ժամ է տվել՝ ուսումնասիրելու ԱՄՆ-ի հանքային առաջարկը։ Այս մասին հայտնում է բրիտանական The Economist ամսագիրը՝ վկայակոչելով աղբյուրներ։

Reuters-ին տված հարցազրույցում նա հայտնել է գործարք կնքելու իր պատրաստակամությունը և Թրամփին առաջարկել է ուկրաինական հանքային պաշարներ և գազի ստորգետնյա պահեստարաններ՝ անվտանգության երաշխիքների դիմաց։ Ուկրաինական պատվիրակությունը շարունակել է առաջարկը քննարկել Մյունխենի անվտանգության համաժողովում, երբ Զելենսկին հանդիպել է ԱՄՆ փոխնախագահ Վենսի և պետքարտուղար Ռուբիոյի հետ։

Կիևի պաշտոնյաներն ասել են, որ իրենք չեն կարող օրինական կերպով ստորագրել համաձայնագիր՝ հրաժարվելու հանքային իրավունքներից այն ձևով, որն առաջարկում է Վաշինգտոնը, սակայն Կիևը շարունակում է այլընտրանքների քննարկումը:

Ըստ The Economist-ի՝ համաձայնագրի իրականացման համար կողմերը կարող են ստեղծել նոր հոլդինգ, որը կվերահսկի օգտակար հանածոների արդյունահանումը, որպեսզի գործարքը չխախտի Ուկրաինայի Սահմանադրության դրույթները, որտեղ ասվում է, որ ընդերքը պատկանում է ուկրաինացի ժողովրդին։