Լավրովը և Ուշակովը մեկնել են Էր Ռիադ՝ ԱՄՆ ներկայացուցիչների հետ բանակցությունների

Ռուսաստանի արտաքին գործերի նախարար Սերգեյ Լավրովը և նախագահի օգնական Յուրի Ուշակովը նախագահ Վլադիմիր Պուտինի հանձնարարությամբ մեկնել են Սաուդյան Արաբիայի մայրաքաղաք Էր Ռիադ՝ ԱՄՆ ներկայացուցիչների հետ բանակցությունների, փոխացում է Euromedia24-ը։

ՌԴ նախագահի մամուլի քարտուղար Դմիտրի Պեսկովը հայտնել է, որ հանդիպումը նվիրված է լինելու Մոսկվայի և Վաշինգտոնի միջև հարաբերությունների վերականգնմանը։

«Այսօր նախագահ Պուտինի հանձնարարությամբ Էր Ռիադ են մեկնում արտաքին գործերի նախարար Լավրովը և նախագահի օգնական Յուրի Ուշակովը: Ակնկալվում է, որ փետրվարի 18-ին նրանք Էր Ռիադում հանդիպում կանցկացնեն իրենց ամերիկացի պաշտոնակիցների հետ, որն ամենից առաջ նվիրված կլինի ռուս-ամերիկյան հարաբերությունների ամբողջ համալիրի վերականգնմանը», - Կրեմլի ներկայացուցչի խոսքերն է մեջբերում ՏԱՍՍ-ը:

Axios լրատվական հարթակն ավելի վաղ հայտնել էր, որ Սաուդյան Արաբիայում ԱՄՆ-ի և ՌԴ-ի պատվիրակությունների հանդիպումը նվիրված է ինելու ռուս-ուկրաինական հակամարտության կարգավորմանը։

Բացի այդ, ԱՄՆ-ի և ՌԴ-ի ներկայացուցիչները քննարկելու են երկու երկրների նախագահներ Դոնալդ Թրամփի և Վլադիմիր Պուտինի  բանակցությունների նախապատրաստման հարցերը։ 

Հիշեցնենք, որ սա Ռուսաստանի նկատմամբ պատժամիջոցներից հետո առաջին կառուցողական հանդիպումն է ԱՄՆ-ՌԴ բարձրաստիճան պաշտոնյաների միջև, որը տեղի կունենա վաղը՝ փետրվարի 18-ին, Ուկրաինայի հարցի կարգավորման նպատակով։