Ռուսաստանը գործընկերներ ունի բոլոր մայրցամաքներում․ Լավրով

Ռուսաստանի իշխանությունները գործընկերային հարաբերություններ են զարգացնում բոլոր մայրցամաքների տարբեր երկրների հետ։ Պետդումայում կառավարության նիստի ժամանակ հայտարարել է ՌԴ ԱԳ նախարար Սերգեյ Լավրովը, մեջբերում է ՏԱՍՍ-ը։

«Մենք բազմաթիվ մշտական ​​գործընկերներ ունենք բոլոր մայրցամաքներում, որոնց մի շարքի հետ մեր հարաբերություններն արդեն հասել են ռազմավարական գործընկերության մակարդակի»,- նշել է նախարարը։

Նա նշել է, որ Մոսկվան ներկայումս երկխոսություն է պահպանում ՀԱՊԿ-ի, ԱՊՀ-ի, ԵԱՏՄ-ի, Թուրքիայի, Իրանի, ԱՄԷ-ի և շատ այլ երկրների հետ։ Լավրովն առանձին-առանձին հիշատակել է Հնդկաստանը, որի հետ Ռուսաստանը վերսկսում է բարձր մակարդակի այցերի փոխանակման պրակտիկան, և հիշեցրել է վարչապետ Նարենդրա Մոդիի՝ անցյալ տարի Մոսկվա կատարած այցը։

ՌԴ ԱԳՆ ղեկավարը հայտարարել է նաև, որ Ռուսաստանը միշտ բաց է հավասար և հարգալից համագործակցության համար նրանց հետ, ովքեր պատրաստ են աշխատել «արդար հավասարակշռության» հիման վրա։