Ուկրաինայի օգտակար հանածոների գործարքը շորթում է․ CNN

Դոնալդ Թրամփը միակ նախագահը չէ, ով կարողանում է տեսնել և ճանաչել վատ գործարքը։ Այս մասին գրում է CNN-ի վերլուծաբան Սթիվեն Քոլինսոնը։

Վլադիմիր Զելենսկու՝ իր երկրի հազվագյուտ հողային օգտակար հանածոների գրեթե կեսը ապագայի շատ չնչին երաշխիքով վաճառելու գործարք կնքելուց հրաժարվելը շատ պատճառներից մեկն է, որ Թրամփը զայրացած է Կիևի իր գործընկերոջ վրա:

Ուկրաինայի նախագահը հասկացրել է, որ իր երկրի թանկարժեք աշխարհագրական և էներգետիկ ռեսուրսների շահագործումը լինելու է նրա տնտեսությունն ու քաղաքները վերականգնելու ճանապարհներից մեկը, երբ պատերազմը վերջնականապես ավարտվի: Սակայն ֆինանսների նախարար Սքոթ Բեսենտի կողմից արված առաջարկը, թեև ԱՄՆ պաշտոնյաները գովաբանում են որպես Ուկրաինայի բարգավաճման առատաձեռն սանդուղք, իրականում ամենևին էլ «գործարք» չէ:

«Գործարքն» ավելի շատ նման է շորթման ձևի, որը Թրամփն արդեն փորձել է օգտագործել Զելենսկու նկատմամբ՝ ռազմական օգնություն տրամադրելով որպես խթան, որպեսզի նա հայտարարի Ջո Բայդենի հետաքննության մասին, ինչը հանգեցրել է Թրամփի առաջին իմպիչմենտին:

Այնուամենայնիվ, Սպիտակ տունն ասում է, որ Զելենսկին այլ ելք չունի, քան ստորագրել ԱՄՆ հարկատուներին Կիևին անհրաժեշտ գումարները վերադարձնելու մասին պայմանագիրը, թեև դա երաշխիք չունի, որ Վաշինգտոնը շարունակելու է օգնություն տրամադրել ապագայում:

«Նախագահ Թրամփն ակնհայտորեն շատ հիասթափված է նախագահ Զելենսկիից հենց հիմա։ Այն փաստը, որ նա չեկավ սեղանի շուրջ բանակցության, որ նա պատրաստ չէր օգտվել մեր առաջարկած հնարավորությունից, կարծում եմ, ի վերջո նա կհասնի այդ կետին, և հուսով եմ՝ շատ արագ», ասել է Սպիտակ տան ազգային անվտանգության հարցերով խորհրդական Մայք Ուոլցը։