Ֆիդանն ու Լավրովը կքննարկեն Ուկրաինային և Մերձավոր Արևելքին վերաբերող հարցեր․ ՏԱՍՍ

Թուրքիայի արտգործնախարար Հաքան Ֆիդանը ծրագրում է փետրվարի 24-ին Անկարայում Ռուսաստանի արտգործնախարար Սերգեյ Լավրովի հետ քննարկել իրավիճակը Մերձավոր Արևելքում, այդ թվում՝ Սիրիայում և Ուկրաինայում և հաստատել ուկրաինական հակամարտության կարգավորման հարցում Թուրքիայի պատրաստակամությունը։ Այս մասին ՏԱՍՍ-ին հայտնել է Թուրքիայի արտգործնախարարությունում իր աղբյուրը։

«Թուրքիայի արտաքին գործերի նախարար Հաքան Ֆիդանը բանակցություններ կվարի իր ռուս գործընկերոջ հետ, որի ընթացքում մանրամասն կքննարկվեն երկկողմ համագործակցության հարցեր, հատկապես՝ առևտրի, էներգետիկայի և զբոսաշրջության հետ կապված: Մտքերի փոխանակում կլինի նաև Ուկրաինայում պատերազմը դադարեցնելու վերաբերյալ՝ դիվանագիտական ​​ջանքերով արդար և տեւական խաղաղության հաստատման միջոցով։ Կքննարկվեն ԱՄՆ-ի և Ռուսաստանի միջև վերջին շփումները, ինչպես նաև այն միջնորդական ներդրումը, որ Թուրքիան կարող է կատարել»,- ասել է աղբյուրը։

Ֆիդանը մտադիր է հիշեցնել, որ 2022 թվականի մարտին Թուրքիան ուղիղ բանակցություններ է կազմակերպել Ուկրաինայի հարցով «և պատրաստ է ստանձնել նույն դերն ապագայում»։

Սիրիական հարցը, ըստ աղբյուրի, կվերաբերի «Սիրիան ահաբեկչական տարրերից ամբողջությամբ մաքրելու Թուրքիայի վճռականությանը»։ «Ֆիդանը մտադիր է ընդգծել Սիրիայի տարածքային ամբողջականության և քաղաքական միասնության պահպանման կարևորությունը: Նա նաև կհայտարարի, որ Իսրայելի ագրեսիվ քաղաքականությունը, որը սպառնում է Սիրիայի տարածքային ամբողջականությանը, անընդունելի է»,- ասել է աղբյուրը։

Մերձավոր Արևելքի խնդրի շուրջ Լավրովի հետ քննարկման համատեքստում Ֆիդանը մտադիր է ուշադրություն հրավիրել այն փաստի վրա, որ «Գազայի հատվածում հրադադարը պետք է մշտական ​​դառնա, իսկ Գազայի համար մարդասիրական օգնության ծավալն ավելացվի»։ Բացի այդ, Թուրքիայի ԱԳՆ ղեկավարը նախատեսում է նշել, որ «պաղեստինցիների բռնի տեղահանումն իրենց հայրենիքից անընդունելի է», իսկ «Մերձավոր Արևելքում խաղաղություն կարող է ձեռք բերվել միայն երկու պետությունների լուծման հիման վրա»։