Մամուլի տեսություն. Տոնավաճառից մինչև Ուոլլ սթրիթ

«Հայաստանի Հանրապետությունը» ներկայացրել է գյուղատնտեսության աշխատողի օրվա առիթով մայրաքաղաքի Հյուսիսային պողոտայում կազմակերպված գյուղատնտեսական ապրանքների տոնավաճառից մանրամասներ, մասնավորապես կարևորել է ՀՀ վարչապետ Տիգրան Սարգսյանի և գյուղնախարար Սերգո Կարապետյանի' տոնավաճառ այցելությունը և մեջբերել կառավարության ղեկավարի խոսքը, որ տոնավաճառի նպատակը գյուղացիներին իրենց ապրանքն առանց միջնորդների Երևանում վաճառելու համար հնարավորության ապահովումն է:

«Առավոտը» կազմակերպված միջոցառումը որակել է «Վերադարձ արմատներին», երբ «գյուղն ու քաղաքը» հանդիպել են Հյուսիսային պողոտայում», իսկ «ՀՀ վարչապետի հեռանալուց հետո»' «ուղղակի զարմանալի» «խրախճանք»:

«Հայացքի» փոխանցմամբ թեև այդ օրը «Հյուսիսային պողոտան վերածվել էր աշնանային գեղեցիկ շուկայի», սակայն, ցավոք, օրվա վերջում «համտեսը վերածվեց թալանի»: «168 ժամը» նկատել է, որ բերքի փառատոնի կազմակերպման համար ՀՀ պետբյուջեից որևէ լումա չի ծախսվել, «Երկիրը»' հավելել իր պատկերացմամբ «բոլորի մոտ» առաջացած հարցը», թե ինչո´ւ բերքի տոնը կազմակերպել «հենց Երևանում, հենց Հյուսիսային պողոտայում», «իսկ գուցե այն հերթական շոո՞ւն էր»:

«Երևում է' Գյումրին այդպես էլ տեխնոքաղաք չի դառնա», եզրակացրել է «Իրավունքը», անդրադառնալով 2012թ. ՀՀ պետական բյուջեի նախագծով բյուջետային բաշխման թեմային ու գրելով, թե պետբյուջեով «Գյումրու տեխնոպարկի գործունեության իրականացման ծրագրի» տողով հատկացվող 200մլն դրամը «չնչին գին է տեխնոպարկ ստեղծելու համար»:

Ըստ «Հայացքի» «գյուղացիները գյուղտեխնիկա, մատչելի վարկ ու թունաքիմիկատ են ուզում», մինչդեռ «պետությունը միայն խոստումներ է շռայլում». մի այլ հրապարակման մեջ թերթը վերստին անդրադարձել է «Փարիզյան սուրճ» ընկերության ֆրանսահայ սեփականատիրոջ' Հայաստանից հեռանալու որոշմանը և նշել, թե իբր երկրում առկա վիճակը... գործարարին ստիպում է հեռանալ հայրենիքից», ինչը բոլորիս համար պետք է ցավ լինի»:

«Հայկական ժամանակը» իր հանգույն պատասխանել է ՀՀ պաշտպանության փոխնախարար Վովա Գասպարյանի' օրերս մամուլի ներկայացուցիչների հետ զրույցներում արտահայտած մեկնաբանություններին' «Պահանջում եմ, որ գործդ լավ անես»: Մի այլ հրապարակման մեջ թերթն անդրադարձել է ՏՄՊՊ հանձնաժողովի կողմից «Գավառտրանս» ընկերությանը 10 մլն դրամի չափով տուգանելու որոշմանը' «Տուգանք կամ հրաժարական»:

«Հրապարակը» տարօրինակ է համարել, որ 2009թ. ՀՀ տնտեսությունը ունեցել է 14.4 տոկոս անկում, մինչդեռ բանկային համակարգը տարին փակել է եկամուտով և իր հանգույն առաջարկել' «Ազատվիր գերությունից»:

Հայաստանի ներքաղաքական օրակարգի ուշադրության կենտրոնում ՀՀԿ-ԲՀԿ հարաբերություններն են, որը մտահոգել է բոլոր լրատվամիջոցներին: «Կոալիցիան փլուզման եզրի՞ն», հարցնում է «Երկիրը», պատասխանը սպասելով ՀՀԿ-ից' հինգշաբթի օրը: «168 ժամը» մտորում է, թե ինչ կլինի «Ուրբաթ օրը և ուրբաթից հետո»: «Հայկական ժամանակին» հուզում է, թե «Ինչ կանի Գագիկ Ծառուկյանը». «Կողմնորոշվիր, Ծառուկյան», իսկ «Ժողովուրդը» կարծում է, որ «ԲՀԿ-ն ժամանակ կձգի, ՀՀԿ-ն էլ կըմբոստանա»: