Հայաստանի ամենատարեց և ամենաերիտասարդ համայնքապետերը. «Հրապարակ»

«Հրապարակ» թերթը գրել է.

«Ովքեր են Հայաստանի ամենատարեց, երկար պաշտոնավարած եւ ամենաերիտասարդ համայնքապետերը: Մենք ուսումնասիրեցինք համայնքապետարանների կայքէջերը եւ տեսանք, որ ամենատարեց պաշտոնյան Շիրակի մարզի Ամասիա խոշորացված համայնքի ղեկավար Ջեմմա Հարությունյանն է` 75 տարեկան: Աշխատանքային գործունեությունը սկսել է 1973-1981թթ․, Ամասիայի ջրային տնտեսությունում աշխատել է որպես գլխավոր ինժեներ, այնուհետեւ՝ Ամասիայի շրջխորհրդի գործադիր կոմիտեի նախագահի տեղակալ: 2016-ից Շիրակի մարզի Ամասիա համայնքի ղեկավարն է: 2021-ին վերընտրվել է, այս անգամ՝ Ամասիա խոշորացված համայնքի ղեկավար: Ջեմմա Հարությունյանը մեզ հետ զրույցում ասաց, որ, չնայած տարիքին, աշխատասեր է, պահանջկոտ է աշխատանքի հարցում, առողջ եւ լավ հիշողություն ունի: Հարցրինք, թե որն է համարում այս տարիների իր գլխավոր ձեռքբերումը։ «Հարգանքը համայնքի բնակիչների կողմից: Ես ամբողջ իմ էներգիան, հնարավորությունս, գիտելիքներս ներդրել եմ համայնքի զարգացման համար: Բնակիչների հետ իմ երկխոսությունը շատ լավ է ստացվում, կարող է որոշ հարց էլ չկարողանամ լուծել, բայց կարողանում եմ զրուցել իրենց հետ, որ ինձնից դժգոհ չգնան»: Մարզպետարանի կայքում գրված է, որ Դուք ՀՀԿ անդամ եք, հիմա՞ էլ։ «Երբեք չեմ եղել ոչ մի կուսակցության անդամ, եղել եմ Կոմունիստական կուսակցության անդամ, հետագայում տոմսս դրել եմ եւ ոչ մի կուսակցության չեմ հարել, անկուսակցական աշխատել եմ եւ ընտրվել եմ Ամասիա համայնքի ղեկավար՝ «Ամասիա-Արփի» կուսակցությունների դաշինքով: Երբ իմ թեկնածությունը դրել եմ` պատգամավոր դառնալու համար, ՀՀԿ-ն ինձ սատարել է, բայց ես իրենց անդամը չեմ եղել»: Գաղտնիք չէ, որ համայնքապետերն իրենց հարազատներին եւ ծանոթներին տեղավորում են համայնքապետարանում աշխատանքի, Դուք ո՞ւմ եք տեղավորել աշխատանքի։ «Ես ընդհանրապես բարեկամներ Ամասիայում չունեմ, իմ ամուսնու կողմից ունեմ բարեկամներ, մեր համայնքապետարանում աշխատում են»:

Արարատ խոշորացված համայնքը ղեկավարում է ՔՊ-ական Ասլան Ավետիսյանը, որը 70 տարեկան է: Նա հրաժարվեց մեր հարցերին բանավոր պատասխանել, ասաց. «Միայն՝ գրավոր»: Ասլանյանը մինչ համայնքի ղեկավար նշանակվելը, որեւէ պետական կառույցում ոչ մի պաշտոն չի ունեցել, միայն մասնավոր կազմակերպության ղեկավար է եղել: Նշենք, որ Արարատի համայնքապետարանի պաշտոնական կայքում որեւէ պաշտոնյայի հեռախոսահամար չկա` անգամ ավագանու անդամների հեռախոսահամարներն են բացակայում: Հարցերին բանավոր չպատասխանելը, ի դեպ, Արարատի համայնքապետարանում ավանդույթ են դարձրել, իսկ որեւէ պաշտոնյայի հետ կապ հաստատելը մեզ համար գլխացավանք է դարձել:

20 տարի շարունակ Արագածոտնի մարզի Ծաղկահովիտ համայնքը ղեկավարում է 69-ամյա Նորաին Հակոբյանը: 1977 թվականից նա շրջանային կինոցանցում ավագ ինժեներ է աշխատել, այնուհետեւ՝ տնօրեն: 2005 թվականից մինչ այսօր Ծաղկահովիտ համայնքի ղեկավարն է: Ի՞նչ կարեւոր ձեռքբերում եք ունեցել այս տարիներին՝ հարցրինք Հակոբյանին։ «Շրջանում մեծ գործեր ենք արել, գազիֆիկացրել ենք 5 գյուղ, բնակելի շենք ենք կառուցել, բնակելի շենքերի տանիքներն ենք փոխել, մեծ գործեր ենք կատարել», -ասաց նա: Համայնքապետի եղբայրը՝ Գեւորգ Հակոբյանը, համայնքի ղեկավարի առաջին տեղակալի օգնականն է: Եղբորորդին՝ Հակոբ Հակոբյանը, մշակույթի, սպորտի եւ երիտասարդության հարցերի, սոցիալական աջակցության բաժնի առաջատար մասնագետը: Նորաին Հակոբյանից հետաքրքրվեցինք, թե հարազատներից էլ ովքեր են աշխատում համայնքապետարանում։ «Մեր ազգությունը շատ փոքր ազգություն է` 3 հորեղբայր եմ ունեցել, որ բոլորին միացնես, երեւի 20 մարդ չկա: Գյուղերն էլ հո ինձ ծանոթ-բարեկամ չե՞ն: Եղբայրս իրավունք չունի՞ աշխատելու, խի տուն չի՞ պահում»:

Իսկ ամենաերկար համայնքապետ աշխատած պաշտոնյան Լոռվա մարզի Լերմոնտովո համայնքի ղեկավար Էդիկ Չախալյանն է: Նա 68 տարեկան է, համայնքը ղեկավարում է 1997 թվականից: 1991-1997թթ. եղել է Լերմոնտովո գյուղի գյուղսովետի նախագահը: 2021թ. նոյեմբերի 14-ին վերընտրվել է Լերմոնտովո համայնքի ղեկավար: Ամուսնացած չէ: Չախալյանից հետաքրքրվեցինք, թե որն է իր երկար պաշտոնավարման գաղտնիքը։ «Գիտեք, ընտրություն ա, մեզ մոտ 80 տոկոս մոլոկաններն են, ժողովուրդը վստահում է ինձ, ես էլ բարի աշխատող եմ»,- ասաց համայնքի ղեկավարը:
Ամենաերիտասարդ համայնքի ղեկավարներն էլ Կոտայքի մարզի Հրազդան խոշորացված համայնքի ղեկավար ՔՊ-ական Սեւակ Միքայելյանն է` 32 տարեկան: 2014 թվականին նա ավարտել է Երեւանի պետական տնտեսագիտական համալսարանի ֆինանսների ֆակուլտետի` «Ապահովագրական գործ» բաժինը: 2017-ին աշխատել է «Գազպրոմ Արմենիա» ՓԲԸ Երեւանի մասնաճյուղում՝ որպես ճարտարագետ: Ազատվել է զինվորական ծառայությունից կարճատեսության պատճառով: Իշխանափոխությունից հետո` 2018 թվականին, ՔՊ-ի կողմից առաջադրվել է Հրազդան համայնքի ղեկավար: Պաշտոնը ստանձնելուց հետո Հրազդանի համայնքապետարանում աշխատանքի են անցել Միքայելյանների բարեկամները, ընկերներն ու ծանոթները:

Բայց Սասուն Միքայելյանի որդին միակը չէ, որ 32 տարեկանում համայնք է ղեկավարում, մյուսը ՔՊ-ական Նորայր Սանթրոսյանն է: Նա 2015-ին ավարտել է Երեւանի պետական համալսարանի իրավագիտության ֆակուլտետը, 2018-ին մագիստրոսի աստիճան է ստացել: Երեւանի Կենտրոն եւ Նորք-Մարաշ դատարանում դատավորի օգնական է աշխատել, 2018-2022 թթ. Ջրվեժի համայնքապետարանում նշանակվել է համայնքի ղեկավարի օգնական, այնուհետեւ՝ համայնքի ղեկավարի տեղակալ: 2023 թվականից Ջրվեժ խոշորացված համայնքի ղեկավարն է»: