Ռազմավարական նոր փաստաթուղթ՝ փոփոխվող աշխարհի հորձանուտի մեջ. զրույց Վահրամ Տեր-Մաթևոսյանի հետ (տեսանյութ)

Տեղական ու միջազգային լուրերի մեծ հոսքի, տարբեր իրադարձությունների մեծ աղմուկի մեջ, կարելի է ասել, աննկատ մնաց մի ուշագրավ տեղեկություն, ըստ որի՝ վարչապետ Նիկոլ Փաշինյանի որոշմամբ ստեղծվելու է Ազգային անվտանգության ռազմավարության վերանայման աշխատանքները համակարգող միջգերատեսչական հանձնաժողով, որը ղեկավարելու է Անվտանգության խորհրդի քարտուղարը: Այլ խոսքերով՝ առաջիկայում մշակվելու և ընդունվելու է Հայաստանի ազգային անվտանգության նոր ռազմավարություն: Ներկայումս գործող ռազմավարական փաստաթուղթն ընդունվել է կրկին Փաշինյանի օրոք՝ 44-օրյա պատերազմից մի քանի ամիս առաջ՝ 2020 թ. հուլիսին, որտեղ մասնավորապես նշվում էր, որ ՀՀ-ն Արցախի անվտանգության երաշխավորն է: Արդյոք այս փաստաթուղթը կյանքի կոչվեց հատկապես Արցախի մասով և արդյոք այսօր անհրաժեշտություն կա Ազգային անվտանգության նոր ռազմավարություն ընդունելու: Թեմայի շուրջ Euromedia24-ի զրուցակիցն է Հայաստանի ամերիկյան համալսարանի պրոֆեսոր Վահրամ Տեր-Մաթևոսյանի հետ:

Իր խոսքում փորձագետը նշեց, որ Ազգային անվտանգության ռազմավարությունը կարևորագույն փաստաթուղթ է, ոմանց կարծիքով՝ Սահմանադրությունից հետո երկրորդ ամենակարևոր փաստաթուղթն է, որը պետք է դառնա կողմնացույց ամբողջ պետական համակարգի և ազգային-պետական որոշումների կայացման համար: Զրուցակցի խոսքով՝ ռազմավարական փաստաթղթի կշիռն այն է, որ որ դրանում ամրագրվում են զարգացման ուղղություններ, սպառնալիքների գնահատում, որոնք պետք է դառնան քաղաքականության իրականացման հիմք: Իսկ նոր ռազմավարության ընդունման համար անհրաժեշտ է գնահատական ներկա քաղաքական և անվտանգային ճարտարապետությանը:

Այդուհանդերձ, Վահրամ Տեր-Մաթևոսյանը շեշտեց, որ այսօր ամենաանհարմար պահն է ռազմավարական փաստաթղթի վերանայման համար, քանի որ սխալ է նախընտրական շրջանում ռազմավարության ծրագիր մշակելը: Սովորաբար դա արվում է հետընտրական շրջանում: Զրուցակիցը նաև հույս հայտնեց, որ վարչապետ Նիկոլ Փաշինյանի կողմից առաջ մղվող «Իրական Հայաստանի» գաղափարախոսությունը տեղ չի գտնի նոր ռազմավարության մեջ, քանի որ այն պետք է զերծ պահել գաղափարախոսական ենթաշերտերից: Ըստ նրա՝ նոր փաստաթուղթը չի կարող շրջանցել նաև աշխարհի նոր իրողությունները և արդեն կայացած փաստը՝ բազմաբևեռ աշխարհակարգի ձևավորումը: Ըստ այդմ, ռազմավարական փաստաթուղթը պետք է պատասխանի այն հարցին, թե ինչպիսի՞ն է լինելու Հայաստանի տեղն ու դերը փոփոխվող աշխարհում:

Մանրամասները՝ տեսանյութում:

Հարցազրույցը վարեց Արամ Սարգսյանը