«Բերում ենք հարկային դաշտ»․ ներդրվում է կրիպտոակտիվների ոլորտի կարգավորման մոդել

Կառավարության նիստի ժամանակ հաստատվեց ««Կրիպտոակտիվների մասին» օրենքի և հարակից մի շարք օրենքներում փոփոխություններ և լրացումներ կատարելու մասին» նախագծերի փաթեթը։ ՀՀ ֆինանսների նախարար Վահե Հովհաննսյանը, ներկայացնելով նախագիծը, նշեց, որ անհրաժեշտ է ներդնել կրիպտոակտիվների ոլորտի համապարփակ կարգավորման մոդել․ «Կրիպտոակտիվների շրջանառության ծավալների մեծացմանը զուգընթաց բազմաթիվ երկրներում, այդ թվում՝ Հայաստանում, զգալի չափով մեծացել է հասարակության ներգրավվածությունն այս ոլորտում: Սակայն կարգավորման դաշտի բացակայության արդյունքում առաջանում են իրավական խնդիրներ՝ կապված կրիպտոակտիվներով ծառայություններ մատուցելու, պետական մարմինների հետ առնչվելու կամ համագործակցելու, հաճախորդների և ներդրողների հետ երկարաժամկետ ու կայուն հարաբերություններ ձևավորելու հետ:

Կրիպտոակտիվների ոլորտի ակտիվության հետ միաժամանակ առաջացել են մի շարք ռիսկեր: Դրանք մեծամասամբ կապված են փողերի լվացման և ահաբեկչության ֆինանսավորման նպատակով կիրառելու վտանգների հետ: Բացի այդ, կրիպտոակտիվների շրջանառության ծավալների շարունական աճը կարող է ստեղծել նաև ֆինանսական կայունության ռիսկեր: Մասնավորապես, հաճախորդների շահերի անբավարար պաշտպանվածությունը թույլ չի տալիս ներգրավել մեծ թվով հաճախորդներ և նրանց հասանելի դարձնել բարձրորակ ծառայություններ, ինչպես նաև հնարավորություն տալ մասնակցել տարաբնույթ ծրագրերի ֆինանսավորմանը՝ նոր թողարկված կրիպտոակտիվներում ներդրումներ կատարելով, իսկ փողերի լվացման և ահաբեկչության ֆինանսավորման և այլ ռիսկերը սահմանափակում են կրիպտոէկոհամակարգի և ֆինանսական համակարգի պատշաճ ինտեգրման և փոխշահավետ համագործակցության հնարավորությունները: Հաշվի առնելով նշված խնդիրներին պատշաճ արձագանքելու կարևորությունը և հրատապությունը՝ անհրաժեշտություն է առաջացել ներդնել կրիպտոակտիվների ոլորտի համապարփակ կարգավորման մոդել»,- ասաց նախարարը։

«Սա կրիպտոարժույթները համակարգելու մեր առաջին փորձն է, որը կատարյալ չի լինելու։ Պետական կառավարման համակարգը հընթացս պետք է գիտելիքներ ձեռք բերի կրիպտոարժույթների մասին»,- ասաց վարչապետ Նիկոլ Փաշինյանը։

ՊԵԿ նախագահ Էդուարդ Հակոբյանը հավելեց, որ ոլորտի կարգավորմումը նաև այդ դաշտում հարկ վճարելու մշակույթ զարգացնելու քայլ է․ «Մենք նաև այդ գործունեությունը բերում ենք հարկային դաշտ»,- նշեց նա։