Մեդվեդևը երախտագիտություն է հայտնել Հյուսիսային Կորեային

ՌԴ Անվտանգության խորհրդի փոխնախագահ Դմիտրի Մեդվեդևը փետրվարի 26-ին Կորեայի Աշխատավորական կուսակցության կենտրոնական կոմիտեի քաղբյուրոյի անդամ Լի Հի Յոնի հետ հանդիպման ժամանակ արդարացի է համարել ԿԺԴՀ-ի կողմից ձեռնարկվող միջոցները իր անվտանգությունն ապահովելու համար և շնորհակալություն է հայտնել Հյուսիսային Կորեայի իշխանություններին Ռուսաստանին աջակցության համար։ Այս մասին հայտնում է Կորեայի կենտրոնական լրատվական գործակալությունը (KCNA):

«Նա երախտագիտություն է հայտնել ԿԺԴՀ-ի կողմից Ռուսաստանի Դաշնությանը ցուցաբերվող աջակցության համար, ինչպես նաև հայտարարել է, որ բոլոր միջոցները, որոնք ԿԺԴՀ-ն ձեռնարկում է իր ինքնիշխանությունն ու անվտանգությունը պաշտպանելու համար, օրինական և արդարացի են»,- հայտնում է գործակալությունը։

Մեդվեդևը նաև նշել է, որ Մոսկվայի և Փհենյանի միջև համապարփակ ռազմավարական գործընկերության պայմանագիրը լիովին համապատասխանում է միջազգային իրավունքին և հաշվի է առնում «փոփոխվող իրողությունները»։