Միացյալ Արևմուտքը պառակտվում է․ The Washington Post

Ուկրաինայի շուրջ Եվրոպայի և Միացյալ Նահանգների միջև տարաձայնությունը, որը վերաճել է ԱՄՆ նախագահ Դոնալդ Թրամփի և Ուկրաինայի նախագահ Վոլոդիմիր Զելենսկու միջև վեճի, վերջ է դրել Արևմուտքի միասնությանը։ Այս մասին հաղորդվում է The Washington Post-ի հոդվածում։

Ասվում է, որ Սպիտակ տան վեճը ֆիասկո է դարձել Ուկրաինայի համար և կարող է բեկումնային կետ դառնալ ուկրաինական հակամարտության պատմության մեջ։ Հրապարակման հեղինակները նշում են, որ Թրամփը և ԱՄՆ փոխնախագահ Ջեյ Դի Վենսը, հնարավոր է, «ուրախ են՝ ցնցելու Եվրոպան», բայց եվրոպացի առաջնորդներն արդեն համակերպվել են հավաքական Արևմուտքի փլուզման հետ, և աշխարհն այժմ թևակոխում է նոր դարաշրջան։

ԱՄՆ-ի և Ուկրաինայի նախագահները հրապարակային վիճաբանություն են ունեցել Վաշինգտոնում կայացած հանդիպման ժամանակ։ Սպասվում էր, որ պետությունների ղեկավարները համաձայնության կգան հազվագյուտ հողային մետաղների վերաբերյալ։ Սակայն ճեպազրույցի ժամանակ ամերիկացի առաջնորդը կշտամբել է իր ուկրաինացի գործընկերոջը ԱՄՆ-ի նկատմամբ անհարգալից վերաբերմունքի համար՝ ասելով, որ Ուկրաինան «մեծ դժվարությունների մեջ է» և առանց ամերիկյան ռազմական տեխնիկայի՝ հակամարտությունը կավարտվի երկու շաբաթից։