Լիբիան փակում է իր պետության սահմանները

Լիբիայի Ազգային խորհուրդը դեկտեմբերի 16-ին հայտարարել է իր 4 հարևան պետությունների հետ սահմանների ժամանակավոր փակման մասին. տեղեկացնում է Agence France-Presse-ը: Ըստ գործակալության տվյալների՝ փակ են լինելու Ալժիրի, Սուդանի, Նիգերի և Չադի հետ սահմանները: Բաց են մնալու սահմանները միայն Եգիպտոսի և Թունիսի հետ՝ համապատասխանաբար երկրի արևելքում և արևմուտքում:

Նման որոշումն Ազգային խորհուրդը բացատրել է երկրի հարավի անապատային տարածքներում մեծացող անկարգությունների ծավալով: Այդ շրջաններում զինված բախումներ են տեղի ունենում զույա և տաբու ցեղերի միջև:

Ազգային խորհրդի որոշմամբ՝ մի շարք հարավային շրջաններ հայտարարվել են որպես փակ ռազմական գոտի, որոնց տարածքում գործելու է արտակարգ իրավիճակի ռեժիմ: Դա նշանակում է, որ, հնարավոր է, այդ շրջաններում նշանակվեն ռազմական նահանգապետեր՝ իրենց լայնածավալ իրավասություններով:

Նման միջոցներով Լիբիայի իշխանությունները մտադիր են պայքարել մասնավորապես անօրինական ներգաղթի դեմ, որի ծավալները մեծանում են Մալիում իսլամական ծայրահեղականների դեմ հնարավոր ռազմական գործողություններ իրականացնելու պատճառով:

Ինչքան ժամանակ է գործելու արտակարգ իրավիճակի ռեժիմը, հայտնի չէ: