Նոր պայթյուններ Իրաքում. կան զոհեր

Իրաքում կիրակի օրը հերթական պայթյուններն են որոտացել, որոնց արդյունքում զոհվել է 10, վիրավորվել՝ 68 մարդ: Ահաբեկիչների հիմնական նպատակը շիական մզկիթներն են եղել:

Երկրի հյուսիսում գտնվող Քիրքուք քաղաքի 2 մզկիթների մոտակայքում, ինչպես նաև Իրաքի հարավային շրջաններից մեկում պայթել են ականապատ մեքենաներ, միաժամանակ գործի են դրվել ճանապարհներին տեղակայված պայթուցիկները: Այս պայթյունների արդյունքում զոհվել է 8, վիրավորվել՝ 55 մարդ:

Մեկ այլ միջադեպ էր տեղի ունեցել Դիյալա նահանգում, ուր պայթյունը որոտացել էր Քուրդիստանի հայրենասիրական միության տեղական բաժանմունքներից մեկի գրասենյակի մոտակայքում: Այստեղ զոհվել էր 2, վիրավորվել՝ 13 մարդ:

Իրաքից ամերիկյան զորքերի դուրսբերումից հետո երկրում ակտիվացել են միջազգային ահաբեկչական ցանցի՝ Ալ Քաիդայի գրոհայինները: Այստեղ գրեթե ամեն օր պայթյուններ են հնչում, որոնց զոհ են գնում հիմնականում խաղաղ բնակիչները: