Երեք հայ գործարար՝ Forbes-ի մարտի համարում

Ռուսաստանի Forbes-ի 2025 թվականի մարտի համարում ներկայացված է անշարժ գույքի խոշոր սեփականատերերի վարկանիշային աղյուսակը, որտեղ տեղ են գտել երկու հայկական անուններ։ Ցուցակը ներառում է 30 խոշոր գործարարների, որոնցից երկուսը՝ Սամվել Կարապետյանը և Դավիթ Ամարյանը, հայկական ծագում ունեն։

Սամվել Կարապետյան – «Տաշիր» խմբի նախագահ

Վարկանիշային աղյուսակում երկրորդ հորիզոնականում է «Տաշիր» խմբի նախագահ Սամվել Կարապետյանը։ 2024 թվականին նրա եկամուտը միայն վարձակալությունից 2023 թվականի համեմատությամբ աճել է 7.3%-ով՝ կազմելով 685 միլիոն դոլար։ Սա չի ներկայացնում նրա ընդհանուր եկամուտը, այլ միայն այն մասը, որը ստացվել է կոմերցիոն և այլ տեսակի անշարժ գույքի վարձակալությունից։ Կարապետյանը տարիներ շարունակ ակտիվորեն զբաղվում է անշարժ գույքի ներդրումներով ոչ միայն Ռուսաստանում և Հայաստանում, այլ նաև նախկին խորհրդային երկրների տարածքում։

Դավիթ Ամարյան – «Բալչուգ Կապիտալ» ընկերության հիմնադիր և ղեկավար

Հաջորդ հայ գործարարը, որը ներառվել է Forbes-ի այս համարում, «Բալչուգ Կապիտալ» ընկերության հիմնադիր Դավիթ Ամարյանն է։ Նրա եկամուտը վարձակալությունից 2024 թվականին աճել է 10%-ով և կազմել 55 միլիոն դոլար։ Ամարյանի «Բալչուգ Կապիտալ» ընկերությանը պատկանում են մի շարք բիզնես կենտրոններ, ինչպես նաև Մոսկվայի ամենախոշոր առևտրի և ժամանցի կենտրոններից մեկը՝ «Մետրոպոլիսը»։ Նրա ընկերությունն ակտիվ ներդրումներ է կատարում անշարժ գույքի ոլորտում՝ զարգացնելով խոշոր կոմերցիոն և առևտրային նախագծեր։

Վրույր Փենեսյան – «Բիզնես Փարթներս օֆ Արմենիա» ընկերության ղեկավար

Forbes-ի նույն համարում անդրադարձ է կատարվել նաև գործարար Վրույր Փենեսյանի նախագծին։ Արձագանքելով հրապարակմանը, Փենեսյանը պատրաստվում է Մոսկվայում ներկայացնել  2 միլիարդ դոլարին համարժեք անշարժ գույք Հայաստանից: Նրա նախաձեռնությամբ ապրիլին կազմակերպվելու է ցուցահանդես «Արարատ Պարկ Հյաթթ Մոսկվա» հյուրանոցում, որին  ներկայացվելու են Հայաստանի լավագույն նորակառույցները։

Ռուսաստանի խոշոր ներդրողների համար կազմակերպվելու է  առանձին բիզնես հանդիպում, որի շրջանակում ներկայացվելու են լայնամաշտաբ ներդրումային նախագծեր Հայաստանից։ 

Ըստ Փենեսյանի ՝ նախաձեռնության հիմնական նպատակը ներդրումների խթանումն է դեպի Հայաստան, ինչպես նաև երկրի անշարժ գույքի ճանաչելիության բարձրացումը միջազգային հարթակներում և նոր գործարար կապերի ստեղծումը։

Այս տվյալները վկայում են այն մասին, որ հայկական ծագում ունեցող գործարարները շարունակում են մեծ ներդրումներ կատարել անշարժ գույքի ոլորտում՝ ինչպես միջազգային, այնպես էլ Հայաստանի շուկայում։