Ազգը վիրուսի մեջ է, փոխնախարարը՝ «կայֆերի»․ «Հրապարակ»

«Հրապարակ» թերթը գրել է․

«Առողջապահական համակարգը զվարճանում է` նախարարի առաջին տեղակալ Լենա Նանուշյանը վերջերս սկսել է սոցիալական ցանցերում կարճ տեսահոլովակներով հրապարակել իր՝ փոխնախարարի առօրյայից։ Մի օր իրենք իրենց գովաբանող փոդքասթ են նկարում` Լենա Նանուշյանի ընկերուհի եւ համատեղությամբ առողջապահության նախարարության Գլոբալ հիմնադրամի ծրագրերը համակարգող խմբի ղեկավար Ինեսա Ասմանգուլյանի հետ, հաջորդ օրերին` հոգեթով երաժշտությամբ ուղեկցվող տեսահոլովակներ իր հանդիպումներից։ Որոշ տեսահոլովակներում էլ նախարարի առաջին տեղակալը ցուցադրում է, թե ինչպես է «վազում» մի հանդիպումից մեկ այլ հանդիպման։ Իրականում առողջապահության նախարարության գլխին աստիճանաբար կուտակվող սեւ ամպերի ֆոնին Լենա Նանուշյանի «շնչակտուր» ակտիվությունն այլ պատճառաբանություն չունի, բացի՝ խուճապը։

Համակարգում բոլորը գիտեն, որ առողջապահության նախարարության քաղաքականության բազմաթիվ որոշումների եւ ոչ միանշանակ «բարեփոխումների» ու կադրային որոշումների իրական հեղինակը ոչ այնքան Անահիտ Ավանեսյանն է, որքան նախարարի տեղակալները եւ հատկապես` Լենա Նանուշյանը։ Դա է պատճառը, որ համակարգում ամենաեկամտաբերը համարվող ՄԻԱՎ-ի դեմ պայքարի ծրագրերի համակարգումը Լենա Նանուշյանը վստահել է իր հոգեբան ընկերուհուն՝ Ինեսա Ասմանգուլյանին: Նա ՄԻԱՎ-ի, տուբերկուլյոզի եւ մալարիայի դեմ պայքարի Գլոբալ հիմնադրամի ծրագրերը համակարգող խմբի ղեկավարն է։ Վերջերս Նանուշյանի կողմից համակարգվող մեկ այլ հաստատությունում՝ Ինֆեկցիոն հիվանդությունների բուժման կենտրոնում, վեցերորդ անգամ վերջին չորս տարվա ընթացքում տնօրեն փոխվեց։ Նորանշանակ տնօրենը նախկինում նույնիսկ տասն անձից բաղկացած անձնակազմ կառավարելու փորձ չունի։

Նախարարությունում ակտիվ խոսակցություններ են շրջանառվում, որ նորանշանակ տնօրենի քավորը Նանուշյանի մտերիմներից է՝ ՊԱԳ-ի պետ Սամվել Խարազյանը։ Հիվանդությունների վերահսկման եւ կանխարգելման ազգային կենտրոնի տնօրեն Ստեփան Աթոյանն էլ է Նանուշյանի մտերիմներից։ Ու թեեւ Աթոյանը 2021 թվականին ընդդիմադիր 5165 շարժմանն էր ակտիվորեն մասնակցում, անգամ ներառված էր ընտրացուցակում, սակայն 2022 թվականին Ինֆեկցիոն հիվանդությունների ազգային կենտրոնի, ապա 2024-ին Հիվանդությունների վերահսկման եւ կանխարգելման կենտրոնում տնօրեն դարձավ։ Աթոյանի քույրն էլ զբաղեցնում է ՄԻԱՎ-ի, տուբերկուլյոզի եւ մալարիայի դեմ ուղղված միջոցառումները համակարգող հանձնաժողովի քարտուղարի պաշտոնը։ Իր ոչինչ չասող տեսահոլովակներից մեկում էլ Նանուշյանը խոսում է իր եւ աշխարհում տարածված «նոր ինֆեկցիաների» մասին։ Իսկ գուցե ինֆեկցիա պետք է ա՞յլ վայրում փնտրել՝ առողջապահության նախարարությունում, օրինակ»։