Լուկաշենկոն չի բացառում Ռուսաստանի և Բելառուսի միասնական խորհրդարանի ստեղծումը

Ռուսաստանը և Բելառուսը, ի վերջո, կարող են գալ մեկ միասնական խորհրդարանի, եթե կողմերը պատրաստ լինեն համապատասխան քայլի։ Այս մասին հայտարարել է Բելառուսի նախագահ Ալեքսանդր Լուկաշենկոն Դաշնային խորհրդում իր ելույթի ժամանակ, փոխանցում է ՌԻԱ Նովոստին։

Մինչ այս Լուկաշենկոն հայտարարել էր, որ Բելառուսը մոտ ապագայում չի մտնի Ռուսաստանի Դաշնության կազմ։

Հինգշաբթի օրը՝ մարտի 13-ին, ուժի մեջ է մտել Ռուսաստանի և Բելառուսի միջև կնքված անվտանգության երաշխիքների մասին համաձայնագիրը։ Բելառուսի նախագահը նշել է, որ երկու երկրները կշարունակեն համատեղ արձագանքել ժամանակակից մարտահրավերներին և ամրապնդել անվտանգությունը Միութենական պետության ներսում։

Պուտինի և Լուկաշենկոյի հանդիպումը տեղի է ունեցել մարտի 13-ին։ Մեկ ժամից մի փոքր ավելի երկու երկրների ղեկավարները դեմ առ դեմ զրուցել են փակ դռների հետևում։ Դրան հաջորդել է բանակցությունների ընդլայնված ձեւաչափը։ Հայտնի է, որ այս հանդիպմանը Ռուսաստանը ներկայացրել են, մասնավորապես, արտգործնախարար Սերգեյ Լավրովը, փոխվարչապետներ Ալեքսանդր Նովակն ու Ալեքսեյ Օվերչուկը, պետության ղեկավարի օգնական Յուրի Ուշակովը և ֆինանսների նախարար Անտոն Սիլուանովը։ ՌԴ նախագահը պարզաբանել է, որ ինքը և Լուկաշենկոն մանրամասն քննարկել են տնտեսության, անվտանգության և պաշտպանության ոլորտների հարցեր։