«Երեքն էլ տարբեր կերպ աջակցում էին Հայաստանին»․ Ալիևը՝ ԵԱՀԿ Մինսկի խմբի մասին

Ադրբեջանի նախագահ Իլհամ Ալիևը կրկին խոսել է Արցախի դեմ ադրբեջանական ագրեսիայի մասին՝ նշելով․ «Թշնամին այնպիսի հզոր ամրություններ էր կառուցել, որ ճեղքելը պահանջում էր և՛ հերոսություն, և՛ պրոֆեսիոնալիզմ։ Շատերը նույնիսկ համոզված էին, որ մենք երբեք չենք կարողանա ճեղքել այս պաշտպանական գծերը, քանի որ տեղանքը ձեռնտու էր թշնամուն, ինժեներական ամրությունները, որ նրանք կառուցել էին երկար տարիների ընթացքում, աշխատում էին իրենց օգտին»։

Նա նաև ԵԱՀԿ ՄԽ անդամ երկրներին մեղադրել է Հայաստանին աջակցելու մեջ։

«Նրանց թիկունքում կանգնած էին արտաքին ուժեր, օտար պետություններ, առաջին հերթին ԵԱՀԿ Մինսկի խումբը, որը մանդատ էր ստացել իբր զբաղվելու այս հարցով։ Նրանց հիմնական նպատակն էր այս հակամարտությունը դարձնել հավերժական, մեր հողերը պահել հավերժ «օկուպացիայի» տակ ․․․ մեզ խաբել, անվերջ բանակցությունների միջոցով ստիպել մեզ ընդունել այս իրողությունը։ Սա երեքի նպատակն էր, երեքն էլ այստեղ միավորվել էին մեկ նպատակի համար։ Թեև այս երկրների միջև ներկայիս հարաբերությունները ցույց են տալիս, որ դա շատ հազվադեպ դեպք էր։ Այսպիսով, ինչ էր սա նշանակում: Երեքն էլ կանգնած էին Հայաստանի թիկունքում, երեքն էլ տարբեր կերպ աջակցում էին Հայաստանին։ Մեկը զենք էր տրամադրում, մյուսը՝ քաղաքական աջակցություն, երրորդը՝ տնտեսական արտոնություններ։ Սրա դեմ ենք կռվել, սրա դեմ ենք պատերազմել»,– հայտարարել է Ալիևը։