ԱՄՆ-ն մտադիր Է հրաժարվել Եվրոպայում ՆԱՏՕ-ի բանակի գլխավոր հրամանատարի պաշտոնից. NBC

ԱՄՆ նախագահ Դոնալդ Թրամփի վարչակազմը դիտարկում է Եվրոպայում ՆԱՏՕ-ի միացյալ զինված ուժերի գերագույն գլխավոր հրամանատարի պաշտոնից հրաժարվելու հնարավորությունը, որը գրեթե 75 տարի զբաղեցրել է բացառապես ամերիկացի գեներալ, հաղորդում է NBC-ն՝ վկայակոչելով ԱՄՆ պաշտպանության նախարարության երկու աղբյուրների եւ Պենտագոնի ներքին ճեպազրույցի տվյալները:

Հեռուստաալիքի տեղեկություններով՝ այդ դերի հնարավոր փոխանցումը ՆԱՏՕ-ի մեկ այլ անդամ պետության քննարկվել է ԱՄՆ ԶՈՒ մարտական հրամանատարությունների մասշտաբային վերակազմավորման շրջանակներում, որն ուղղված է ծախսերի կրճատմանը:

Ճեպազրույցի տվյալների համաձայն՝ քննարկվել է նաև ԱՄՆ եվրոպական և աֆրիկյան հրամանատարությունների միավորումը Շտուտգարտում մեկ շտաբում, ինչպես նաև Հարավային հրամանատարության փակումը և Հյուսիսային հրամանատարության հետ միավորումը:

Բոլոր առաջարկների իրականացման դեպքում առաջին տարում խնայողությունները կարող են կազմել մինչև 270 մլն դոլար, ինչը համարժեք Է Պենտագոնի տարեկան բյուջեի 0,03 տոկոսին:

NBC-ն հիշեցնում է, որ Թրամփն ավելի վաղ քննադատել էր ՆԱՏՕ-ի դաշնակիցներին պաշտպանական անբավարար ծախսերի համար եւ թույլ էր տվել, որ ԱՄՆ-ն հրաժարվի պաշտպանել այն երկրներին, որոնք չեն կատարում բյուջեի պարտավորությունները:

Պենտագոնն ու սպիտակ տունը դեռևս չեն մեկնաբանել այդ ծրագրերը։