Ուկրաինայի հարցով ՌԴ-ի և ԱՄՆ-ի բանակցությունները կանցնեն Մոսկվայի սցենարով. փորձագետ

Ուկրաինայի հարցով Ռուսաստանի և ԱՄՆ-ի բանակցությունները, ամենայն հավանականությամբ, կարող են ընթանալ Մոսկվայի սցենարով, քանի որ Վաշինգտոնը հաղթաթղթեր չունի։ Այս մասին Yomiuri թերթին հայտնել է Ճապոնիայում հայտնի փորձագետ, երկրի պաշտպանության նախարարությանը կից պաշտպանական հետազոտությունների ինստիտուտի առաջատար աշխատակից Սինձի Հեյդոն, փոխանցում է EADaily-ն։

«ԱՄՆ-ի հետ Ռուսաստանի առևտրի ծավալը համեմատաբար փոքր է։ Եվ բարձր մաքսատուրքերի տեսքով «մտրակը», որը սիրում է օգտագործել նախագահ Դոնալդ Թրամփը, Մոսկվայի հետ հարաբերություններում մեծ արդյունավետություն չունի։ Հետևաբար, Ուկրաինայի շուրջ բանակցություններն առաջ մղելու համար Թրամփը ստիպված կլինի համաձայնել Ռուսաստանի պայմաններին: ԱՄՆ-ի համար դժվար կլինի փոխել Մոսկվայի սցենարով զարգացող բանակցությունների ընթացքը», - հայտնել է փորձագետը:

Նրա կարծիքով՝ այդ ուղղությամբ համագործակցությունը հեռանկարում կարող է հանգեցնել Ռուսաստանի դեմ պատժամիջոցների թուլացմանը։

Asahi թերթին տված մեկնաբանության մեջ փորձագետն ասել է, որ Ուկրաինայի հարցով ռուս-ամերիկյան սկսված շփումները «առաջին մեծ քայլն էին լարվածությունը մեղմելու ուղղությամբ»:

«Սակայն Ռուսաստանը առավելություն ունի ռազմի դաշտում և առանց նախապայմանների հրադադարի գնալու պատճառ չունի», - եզրափակել է Հեյդոն: