Կառավարությունն էլ ունի խնդիր, չկա մշակութային արժեքների գնի որոշման շուկայական մեխանիզմ. Ժաննա Անդրեասյան

«Հայաստանում մշակութային աճուրդների դաշտը կայացած չէ, ինչը բացասական ազդեցություն ունի ընդհանուր արվեստի շուկայի կայացման գործում»,-կառավարության նիստում ասաց ԿԳՄՍ նախարար Ժաննա Անդրեասյանը՝ զեկուցելով մշակութային աճուրդները կանոնակարգող օրենսդրական փաթեթը։

Նրա խոսքով, մինչ այժմ կանոնակարգված չեն արվեստի գործերի առքուվաճառքի գործընթացները, բացակայում է արվեստի պատկերասրահների և աճուրդային տների միջև համագործակցությունը։

«Միաժամանակ, արվեստի ստեղծագործությունների բաց հոսքերը և թափանցիկ շրջանառությունը ստեղծում են հնարավորություններ պետության կողմից մշտադիտարկում իրականացնելու և պետության համար կարևոր նշանակության մշակութային արժեքների ձեռքբերման տեսանկյունից»,- ասաց նախարարաը և հավելեց.

«Կառավարությունն էլ ունի խնդիր, մենք արդեն երկու տարի է վերականգնել ենք թանգարանային հավաքածուների համալրման գործընթացը և ինքներս մշակութային արժեքները ձեռք բերելու խնդիր ունենք, որպեսզի նաև մեր ժամանակակից արվեստի գործերը ձեռք բերենք, բայց մենք բախվեցինք նույն խնդրին, որ չկա գնի որոշման շուկայական մեխանիզմ»

Նիկոլ Փաշինյանն էլ ասաց, թե անկախ Հայաստանի արվեստը թանգարաններում շատ քիչ է ներկայացված։

«Սա կապ ունի պետականության ու անկախության ընկալման այն պրոբլեմների հետ, որի մասին խոսում ենք։  Աշակերտներին խթանում ենք, որ գնան թանգարաններ, գնում են ու տեսնում շատ կարևոր ժառանգություն, բայց անկախությունից հետո բաց է, վակուում է, ոչ մի բան չկա»,- նշեց նա։