Իսպանիայում Ֆրենսիս Բեկոնի 5 միլիոն եվրո արժողությամբ նկարը գողանալու կասկածանքով՝ տղամարդու են ձերբակալել

Մադրիդում մի տղամարդ է ձերբակալվել, ով կասկածվում է բրիտանացի նկարիչ Ֆրենսիս Բեկոնի կտավներից մեկը գողանալու մեջ։ Այս մասին հայտնում է RIA Novosti-ն՝ հղում անելով Իսպանիայի ազգային ոստիկանության մամուլի հաղորդագրությանը։

Թագավորության իրավապահ մարմինները հայտարարել են, որ տղամարդը գողացել է նկարչի հինգ անհետացած նկարներից միայն մեկը։ Դրա արժեքը գնահատվում է 5 մլն եվրո (գործող փոխարժեքով՝ գրեթե 2 մլրդ դրամ–խմբ․)։

Իսպանիայի ազգային ոստիկանությունը պարզաբանել է, որ 2015 թվականին Մադրիդի առանձնատներից գողացել են Ֆրենսիս Բեկոնի հինգ կտավները, որոնք միասին արժեն 25 մլն եվրո։ Ներկա պահին գողության կասկածանքով արդեն ձերբակալվել է 16 մարդ, իսկ հինգ նկարներից չորսը վերադարձվել է։ Ոստիկանությունից հայտնել են, որ վերջին նկարի որոնումները շարունակվում են։

Ֆրենսիս Բեկոնը էքսպրեսիոնիստ նկարիչ է և ֆիգուրատիվ նկարչության վարպետ։ Իր ստեղծագործություններում նա պատկերել է աղավաղված մարդու մարմին։ Նրա կտավները բարձր են գնահատվում արվեստի աշխարհում և համարվում են ամենաթանկներից: Այսպիսով, Բեկոնի «Երեք էսքիզ Լյուսիեն Ֆրոյդի հետ» կտավը մի քանի տարի առաջ աճուրդում վաճառվել է 142,4 միլիոն դոլարով։