«Պարոն Ոչը». ՌԴ ԱԳ նախարար Սերգեյ Լավրովն այսօր դառնում է 75 տարեկան (լուսանկարներ)

Այսօր ՌԴ ԱԳ նախարար Սերգեյ Լավրովի 75-ամյա հոբելյանն է։ Նա ծնվել է Մոսկվայում՝ 1950 թվականին։ 1972 թվականին ավարտել է ԽՍՀՄ արտաքին գործերի նախարարության Մոսկվայի միջազգային հարաբերությունների պետական ​​ինստիտուտը (Արևելյան բաժին)։ Տիրապետում է անգլերենին, ֆրանսերենին և սինհալերենին (Շրի Լանկայի հիմնական բնակչության լեզուն-խմբ.):

Լավրովը ՌԴ արտաքին գործերի նախարարությունը ղեկավարում է 2004 թվականից, ինչը նրան իսկական «երկարակյաց» է դարձնում կառավարության անդամների շրջանում։ Նա երրորդ քարտուղարից դարձել է բաժնի վարիչ: Իր դիվանագիտական ​​գործունեությունը սկսել է 1972 թվականին՝ Շրի Լանկայում ԽՍՀՄ դեսպանատանը։ Հարցազրույցներում իր խոստովանությունների համաձայն՝ նա ձեռք է բերել իր ֆիրմային արևայրուքը դեռ Շրի Լանկայում ապրելու ժամանակ և այժմ «պարզապես պահպանում է այն»։

2014 թվականին Foreign Policy ամսագիրը Լավրովին անվանել է «Պարոն Ոչ»՝ ի նմանություն ԽՍՀՄ արտգործնախարար Անդրեյ Գրոմիկոյի, ով ավելի քան 20 անգամ օգտագործել է իր վետոյի իրավունքը ՄԱԿ-ի Անվտանգության խորհրդում։

Sky News Arabia-ին տված հարցազրույցում Լավրովը խոստովանել է, որ հպարտ է՝ լինել «պարոն Ոչ», եթե դա նշանակում է կանխել միջազգային իրավունքի խախտումները։

Տասը տարի առաջ, երբ նրան հարցել են իրանական միջուկային ծրագրի շուրջ Լոզանի բանակցություններում հաջողության հեռանկարների մասին, նա պատասխանել է. «Ես չեմ վարձատրվում լավատես լինելու համար»։ Այս մեջբերումը դարձել է այն բազմաթիվ ասույթներից մեկը, որն ամբողջացնում է Լավրովի դիմանկարը, ով ավելի քան 20 տարի ղեկավարում է ՌԴ ԱԳՆ-ն։