Թուրքիայում ցույցերը կարող են հանգեցնել Էրդողանի տապալմանը. արտաքին ուժերը կմիջամտեն վերջին պահին (տեսանյութ)

Թուրքիայում Ստամբուլի քաղաքապետ Էքրեմ Իմամօղլուի ձերբակալությունից հետո սկսված բողոքի հզոր ցույցերը կարող են հանգեցնել նախագահ Ռեջեփ Թայիփ Էրդողանի իշխանության տապալմանը: Euromedia24-ի հետ զրույցում այսպիսի կանխատեսում արեց թուրքագետ Հակոբ Չաքրյանը:

Թուրքագետը նշեց, որ ի պաշտպանություն Իմամօղլուի սկսված բողոքի ցույցերը տեղի են ունենում ոչ միայն Ստամբուլում և մայրաքաղաք Անկարայում, այլև Իզմիրում, Տրապիզոնում, Անթալիայում և երկրի այլ խոշոր քաղաքներում:

Ստամբուլի քաղաքապետ, նախագահ էրդողանի քաղաքական գլխավոր հակառակորդը համարվող Էքրեմ Իմամօղլուն ձերբակալվել է չորեքշաբթի օրը՝ մարտի 19-ին: Թուրքական իշխանությունները նրան կասկածում են ստվերային եկամուտների, փողերի լվացման և ահաբեկչական կապերի մեջ, սակայն ընդդիմությունը համոզված է, որ տեղի ունեցողը քաղաքական ակնհայտ հետապնդում է քեմալական Ժողովրդա-հանրապետական կուսակցությունը ներկայացնող Իմամօղլուի նկատմամբ, որը կարող է դառնալ 2028 թ. կայանալիք նախագահական ընտրություններում Էրդողանի գլխավոր մրցակիցը: Իմամօղլուն մեկ տարի առաջ Ստամբուլի քաղաքապետի ընտրություններում ձայների մեծ առավելությամբ հաղթել էր Էրդողանի ղեկավարած՝ իշխող «Արդարություն և զարգացում» կուսակցության թեկնածուին: Ստամբուլի քաղաքապետի հետ միասին ձերբակալվել է ևս 87 հոգի՝ քաղաքապետարանի աշխատակիցներ, լրագրողներ, գործարարներ:

Մանրամասները՝ տեսանյութում:

Արամ Սարգսյան