ԱՄՆ-ն ցանկանում է Ուկրաինայում հրադադարի հասնել մինչև ապրիլի 20-ը․ Bloomberg

Սպիտակ տունը ձգտում է մինչև Սուրբ Զատիկ՝ ապրիլի 20-ը, Ուկրաինայում հրադադարի շուրջ համաձայնություն ձեռք բերել։ Այս մասին կիրակի օրը՝ մարտի 23-ին, DW–ի փոխանցմամբ՝ հայտնել է ամերիկյան Bloomberg գործակալությունը՝ հղում անելով անանուն աղբյուրներին։

Նրանց տվյալներով՝ ԱՄՆ վարչակազմն ինքը խոստովանում է, որ այդ ժամկետները կարող են փոփոխվել, քանի որ պատերազմող կողմերի դիրքորոշումները շատ առումներով տարբերվում են։ Bloomberg-ը մեջբերել է ԱՄՆ Ազգային անվտանգության խորհրդի խոսնակ Բրայան Հյուզի խոսքերը, որը դեմ է արտահայտվել, որ «բանակցությունների պայմանները կամ ժամկետները քննարկվեն ԶԼՄ-ներում»:

Գործակալության մյուս աղբյուրները կարծիք են հայտնել, որ Կրեմլը չի ​​համաձայնի Դոնալդ Թրամփի և Վլադիմիր Պուտինի անձնական հանդիպմանը, քանի դեռ խաղաղության համաձայնագիր ձեռք չի բերվել։ Իսկ ապրիլի կեսերին դա քիչ հավանական է, կարծում են նրանք։

«ԱՄՆ-ը խաղաղության համաձայնագրի արագ կնքման հույս ունի, սակայն Պուտինը, կարծես թե, չի շտապում»,- գրում է Bloomberg-ը։ Որպես օրինակ՝ գործակալությունը բերում է Ռուսաստանի և Ուկրաինայի միջև շարունակվող անօդաչու թռչող սարքերով հարձակումները, ինչպես նաև այն, որ Ռուսաստանի Դաշնության կողմից բանակցում է Սերգեյ Բեսեդան՝ ՌԴ ԱԴԾ-ից։

Bloomberg-ը բանակցություններում Մոսկվայի պահանջներն անվանել է «մաքսիմալիստական»։