Ստեղծվել է մոլեկուլ, որը չեզոքացնում է նորովիրուսի շտամների մինչև 75%-ը

Տեխասի և Հյուսիսային Կարոլինայի համալսարանների գիտնականները ստեղծել են հակամարմիններ, որոնք կարող են պայքարել նորովիրուսների 75%-ի դեմ: Հետազոտության արդյունքները հրապարակվել են Science Translational Medicine (STM) ամսագրում։

Այս հայտնագործությունը կարող է կարևոր քայլ լինել նորովիրուսային վարակի համընդհանուր պատվաստանյութի ստեղծելու և արդյունավետ բուժման համար: Վիրուսը ամեն տարի վարակում է ավելի քան 700 միլիոն մարդու։ Հիվանդության հիմնական ախտանշաններն են փսխումն ու թուլացած կղանքը, ինչպես նաև որովայնի շրջանում դղրդյունը, ցավն ու ջերմությունը։ Նորովիրուսը հատկապես վտանգավոր է փոքր երեխաների, տարեցների և թուլացած իմունային համակարգ ունեցող մարդկանց համար։

Պատվաստանյութի ստեղծման հիմնական խնդիրը վիրուսի բարձր գենետիկ փոփոխականությունն էր և արագ մուտացիայի ենթարկվելու ունակությունը: Հետազոտության ընթացքում հետազոտողները ուսումնասիրել են իմունային պատասխանները այն մարդկանց մոտ, ովքեր ստացել են բանավոր նորովիրուսային պատվաստանյութ, որը մշակվել է Vaxart-ի կողմից: Պարզվել է, որ որոշ մասնակիցներ մշակել են հակամարմիններ, որոնք կարող են չեզոքացնել նորովիրուսի մի քանի շտամներ, այդ թվում՝ նրանք, որոնք առաջացնում են համաշխարհային բռնկումների մոտ 75%-ը:

Ամենահեռանկարային հակամարմիններից մեկը VX22 մոլեկուլն է, որն ուղղված է վիրուսի կառուցվածքում նախկինում անհայտ խոցելիությանը: Ի տարբերություն սովորական հակամարմինների, որոնք գործում են միայն մեկ կամ երկու շտամների վրա, VX22-ն ի վիճակի է չեզոքացնել նորովիրուսի բազմաթիվ գենոտիպեր:

Հետազոտողները հիշեցրել են, որ նորովիրուսը հեշտությամբ տարածվում է սննդի, ջրի և մակերեսների միջոցով՝ վտանգելով մարդկանց առողջությանը դպրոցներում, առողջապահական հաստատություններում և այլ փակ տարածքներում: Պատվաստանյութը, որը կարող է պաշտպանել վիրուսի բազմաթիվ շտամներից, կարող է առանցքային դեր խաղալ համաճարակների կանխարգելման գործում:

Թարգմանությունը՝ Մանուել Թամազյանի