Թուրքիայում 43 ցուցարար է ձերբակալվել

Ստամբուլի կենտրոնում ոստիկանությունը ձերբակալել է 43 ցուցարարի, սոցցանցերում հայտնել է Թուրքիայի ներքին գործերի նախարար Ալի Երլիքայան։

Երկուշաբթի օրը կրկին բազմահազարանոց ընդդիմության հանրահավաք է տեղի ունեցել քաղաքապետարանի մոտ գտնվող Սարաչխանե հրապարակում։ Ցուցարարների փոքր խմբերը փորձել են ցույցեր անցկացնել նաև Ստամբուլի այլ շրջաններում։

Նախարարի խոսքով՝ իրավապահ մարմինները միջոցներ են ձեռնարկել Սարաչխանում տեղի ունեցած հանրահավաքում Թուրքիայի նախագահ Ռեջեփ Թայիփ Էրդողանի հանգուցյալ մորը վիրավորողների դեմ։

Ստամբուլի քաղաքապետ Էքրեմ Իմամօղլուն ձերբակալվել է մարտի 19-ին կոռուպցիայի, կաշառակերության և ահաբեկչական գործունեությանը նպաստող կազմակերպության հետ կապված գործով։ Քաղաքական գործիչը հինգ ժամ ցուցմունք է տվել Արդարադատության պալատում և, ըստ լրատվամիջոցների, հերքել է ահաբեկիչների հետ կապերի մեղադրանքները և քննադատել է իր ձերբակալության մեթոդը։ Նա ձերբակալվել է կիրակի օրը և ժամանակավորապես հեռացվել է աշխատանքային պարտականություններից։